تاجر کو انکاؤنٹر کا خوف دکھا کر 20 لاکھ روپئے وصولنے پر معطل 2 سب انسپکٹر فرار، پولیس کر رہی تلاش!

میرٹھ کے لوہیا نگرتھانے میں ایک مبینہ مخبر کی اطلاع پر دو سب انسپکٹروں کے ذریعہ ایک مسلم تاجر کو اغوا کرنے، اس سے 20 لاکھ روپئے وصول کر فرار ہونے کا سنسنی خیز معاملہ سامنے آیا ہے۔ معلومات کے مطابق میرٹھ کے لوہیا نگر تھانے میں تعینات 2003 بیچ کے 2 سب انسپکٹروں نے مخبر کے ساتھ مل کر لساڑی گیٹ کے مشہور دھاگہ تاجر کو اغوا کیا، پھر انکاؤنٹر کا خوف دکھا کر اس سے 20 لاکھ روپئے وصول کر لیے۔

بات یہیں پر ختم نہیں ہوئی، ملزم پولیس افسران کے ذریعہ دوبارہ 10 لاکھ روپے مانگے جانے پر متاثرہ نے سینئر افسران سے شکایت کر دی، جس کے بعد معاملے کا انکشاف ہوا۔ پولیس سپرنٹنڈنٹ نے فوری کارروائی کرتے ہوئے دونوں سب انسپکٹروں کو معطل کر دیا ہے۔ تاہم واقعہ کے بعد دونوں فرار ہو گئے، انہیں تلاش کرنے کے لیے پولیس کی ٹیمیں چھاپے ماری کر رہی ہیں۔

یہ واقعہ چند روز قبل اس وقت سامنے آیا جب سب انسپکٹرز کو زمین کے عوض بڑی رقم منتقل ہونے کی اطلاع پر تاجر کو سونا اسمگلنگ میں پھنسانے کی دھمکی دی۔ انہوں نے 20 لاکھ روپے وصول کرلئے اور دوبارہ 10 لاکھ روپے مانگنے پر متاثرہ نے افسران سے شکایت کردی۔ خفیہ تفتیش اور موبائل لوکیشن کی بنیاد پر جرم ثابت ہونے کے بعد ایس ایس پی نے دونوں پولیس افسران کے خلاف مقدمہ درج کر کے چھاپہ ماری شروع کر دی ہے۔

معلوم ہوکہ متاثرہ کا میرٹھ اور دبئی میں امپورٹ ایکسپورٹ کا بڑا کاروبار ہے۔ اس نے حال ہی میں زمین فروخت کی تھی جس کی خبر ایک مبینہ مخبر کو لگ گئی۔ مخبر نے لالچ میں آکر لوہیا نگر تھانے کے دو سب انسپکٹروں کے ساتھ مل کر رقم وصولی کا جال بچھایا۔ سب انسپکٹروں نے تاجر کو اغوا کیا اور سونے کی اسمگلنگ کے معاملے میں جیل بھیجنے کی دھمکیاں دیں۔ خوف زدہ تاجر نے اس وقت 20 لاکھ روپئے دے دیئے۔

جب سب انسپکٹروں کی لالچ بڑھی اور انہوں نے مزید 10 لاکھ روپے مانگے تو تاجر نے ایس ایس پی اور ایس پی سٹی سے مدد مانگی۔ پولیس کی خفیہ جانچ میں الیکٹرانک سرویلنس کا سہارا لیا گیا۔ تفتیش میں انکشاف ہوا کہ رقم وصولی کے دن تینوں کے موبائل لوکیشن ایک ہی جگہ پر تھے۔ کچھ ویڈیو فوٹیج بھی ملیں جس میں تاجر کو اغوا کرکے گھمایا جارہا تھا۔ ان کی شناخت کی تصدیق ہوتے ہی دونوں سب انسپکٹر موقع سے فرار ہوگئے۔

’آج تک‘ کی نیوز کے مطابق میرٹھ کے ایس ایس پی اویناش پانڈے نے معاملے کی تصدیق کرتے ہوئے بتایا کہ ملزم سب انسپکٹروں کی شناخت لوہیا نگر تھانے کے اہلکاروں کے طور پر ہوئی ہے۔ انہوں نے کہا کہ محکمہ پولیس میں کرپشن برداشت نہیں کی جائے گی۔ دونوں سب انسپکٹروں کے خلاف مقدمہ درج کر لیا گیا ہے اور تھانہ انچارج کے کردار کی بھی تفتیش کی جا رہی ہے۔ پولیس کی ٹیمیں مفرور سب انسپکٹروں کی گرفتاری کے لیے ممکنہ ٹھکانوں پر چھاپے مار رہی ہیں۔