ٹی وی اداکار رتوراج سنگھ کا 59 سال کی عمر میں دل کا دورہ پڑنے سے انتقال

ممبئی: ٹی وی انڈسٹری کے تجربہ کار اداکار رتوراج سنگھ پیر اور منگل کی درمیانی شب دل کا دورہ پڑنے سے انتقال کر گئے۔ ان کی عمر 59 سال تھی۔ رتوراج کو ممبئی کے لوکھنڈ والا میں واقع اپنے گھر پر دل کا دورہ پڑا تھا۔ اداکار کے اچانک انتقال سے ٹی وی انڈسٹری میں سوگ کی لہر دوڑ گئی ہے۔ شائقین بھی کافی حیران ہیں۔

نوے کی دہائی میں زی ٹی وی پر ریئلٹی گیم شو 'تول مول کے بول' کی میزبانی کر کے اپنی پہچان بنانے والے رتوراج سنگھ نے ٹی وی پر کئی سیریلز، کئی فلموں اور او ٹی ٹی شوز میں کام کیا تھا۔ 1993 میں زی ٹی وی پر ن کا ٹی وی شو 'بنے گی اپنی بات' نشر ہوا تھا، جو بھی کافی مقبول ہوا تھا۔ اس کے علاوہ انہوں نے 'ہٹلر دیدی'، 'جیوتی'، 'شپتھ'، 'عدالت'، 'آہٹ'، 'دیا اور باتی'، واریر ہائی'، 'لاڈو 2' جیسے سیریلز میں بھی اہم کردار ادا کیے تھے۔

رپورٹ کے مطابق رتوراج کے اچھے دوست امت بہل نے اداکار کی موت کی تصدیق کی اور اس پر غم کا اظہار کیا۔ انہوں نے کہا، ’’ہاں، ان کی موت حرکت قلب بند ہونے کی وجہ سے ہوئی، انہیں کچھ عرصہ قبل علاج کے لیے اسپتال میں داخل کرایا گیا تھا، گھر واپس آنے کے بعد انہیں دل کی کچھ پیچیدگیوں کا سامنا ہوا اور ان کا انتقال ہو گیا۔‘‘

سوشل میڈیا پر بہت سے مداح اداکار کو خراج تحسین پیش کر رہے ہیں، وہیں کئی مشہور شخصیات بھی اداکار کی موت پر غم کا اظہار کر رہے ہیں۔ بالی ووڈ اداکار ارشد وارثی نے بھی اداکار کو جذباتی خراج تحسین پیش کیا۔ ارشد نے ایکس پر لکھا، ’’مجھے یہ جان کر بہت دکھ ہوا کہ رتوراج کا انتقال ہو گیا۔ ہم ایک ہی بلڈنگ میں رہتے تھے۔ وہ ایک پروڈیوسر کے طور پر میری پہلی فلم کا حصہ تھے۔ آج میں نے ایک دوست اور عظیم اداکار کھو دیا۔ آپ کی یاد آئے گی بھائی۔‘‘

ان دنوں رتوراج کو ٹی وی کے سب سے مشہور شو انوپما میں دیکھا جا رہا تھا اور وہ اپنے کردار کے لیے کافی پسند کئے جا رہے تھے۔ اداکار نے یہ رشتہ کیا کہلاتا میں بھی کردار ادا کیا تھا۔ فی الحال ان کے انتقال کی خبر نے سب کو حیران کر دیا ہے۔