بی جے پی حکومت کے ذریعہ یوتھ کانگریس کارکنان کی گرفتاری پوری طرح غیر آئینی اور جمہوریت کا قتل: اجئے ماکن

نئی دہلی: دہلی کانگریس کمیٹی کے صدر دیویندر یادو کی قیادت میں کانگریس کے خزانچی و رکن پارلیمنٹ اجئے ماکن، سابق دہلی کانگریس صدر چودھری انل کمار، سابق سی ایل پی لیڈر ہارون یوسف، دہلی حکومت کے سابق وزیر منگت رام سنگھل، ڈاکٹر نریندر ناتھ سمیت سابق اراکین اسمبلی اور کمیونیکیشن شعبہ کے چیئرمین انل بھاردواج وغیرہ پر مشتمل سینئر رہنماؤں کے ایک اعلیٰ سطحی وفد نے آج دہلی کے لیفٹیننٹ گورنر وی کے سکسینہ سے ملاقات کی۔ اس وفد نے ’بھارت منڈپم‘ میں اے آئی کانفرنس کے خلاف احتجاج کرنے پر دہلی پولیس کی جانب سے یوتھ کانگریس کارکنان کی غیر آئینی گرفتاری اور ان کے خلاف سنگین فوجداری دفعات عائد کیے جانے کے معاملے میں لیفٹیننٹ گورنر سے ’لوک نواس‘ میں ملاقات کی۔ وفد نے انہیں ایک میمورنڈم پیش کر حراست میں لیے گئے نوجوانوں کے ساتھ قانون کے دائرے میں ضبط اور مساوات برتنے کا مطالبہ کیا۔

کانگریس وفد نے پولیس کی جانب سے گرفتاری اور شروع کی گئی فوجداری کارروائی پر ’سنگین تشویش‘ ظاہر کی۔ وفد نے کہا کہ یوتھ کانگریس کارکنان کا یہ ایک علامتی سیاسی احتجاج تھا۔ گرفتار نوجوانوں پر کسی عوامی تشدد، املاک کو نقصان پہنچانے یا عوامی سلامتی کو خطرہ پہنچانے کا کوئی الزام ثابت نہیں کیا گیا ہے۔

رکن پارلیمنٹ اجئے ماکن نے کہا کہ بی جے پی جمہوریت میں اظہار رائے کی آزادی کو ختم کرنا چاہتی ہے، جبکہ جمہوریت میں اپوزیشن کو اپنی بات رکھنے کا مکمل حق حاصل ہے۔ بی جے پی حکومت کی جانب سے یوتھ کانگریس کارکنان کی گرفتاری سراسر غیر آئینی ہے اور یہ جمہوریت کا قتل ہے۔ انہوں نے مزید کہا کہ ملک مخالف فیصلوں کے خلاف اپوزیشن کو آواز اٹھانے کا پورا حق ہے اور بین الاقوامی امور پر بھی حکومت کے خلاف اپوزیشن کو پُرامن طریقے سے اپنی بات رکھنے کا حق حاصل ہے۔

دہلی کانگریس صدر دیویندر یادو نے میڈیا کو جانکاری دی کہ معزز لیفٹیننٹ گورنر نے کانگریس کے اعلیٰ سطحی وفد کو صبر کے ساتھ سنا اور معاملے کو مساوی بنیاد پر دیکھتے ہوئے غیر جانبدارانہ جانچ یقینی بنانے کا وعدہ کیا، کیونکہ یوتھ کانگریس کا احتجاج ’علامتی اور سیاسی‘ نوعیت کا تھا۔ انہوں نے یہ بھی کہا کہ یوتھ کانگریس کے صدر اودے بھانو چِب کو حراست میں لینا مکمل طور پر غیر قانونی ہے۔ اپوزیشن کو پُرامن انداز میں اپنی بات رکھنے کا پورا حق ہے، لیکن برسراقتدار بی جے پی آمرانہ طرز عمل اختیار کر رہی ہے۔

دیویندر یادو کا کہنا ہے کہ کانگریس کے ذریعہ لیفٹیننٹ گورنر کو پیش میمورنڈم میں ’قانون کے نفاذ میں تناسب، جمہوری سیاسی اظہار کے تحفظ اور اس امر کو یقینی بنانے کی ضرورت‘ پر زور دیا گیا ہے کہ سیاسی اختلاف رائے سے پیدا ہونے والے مقدمات یا الزامات حد سے زیادہ سخت یا غیر ضروری طور پر سخت نہ ہوں۔ انہوں نے کہا کہ نوجوانوں کی گرفتاری مکمل طور پر غیر آئینی ہے اور حکومت کے ملک مخالف فیصلوں کے خلاف احتجاج کرنا سیاسی پارٹیوں کا جمہوری حق ہے۔

کانگریس وفد نے لیفٹیننٹ گورنر سے درخواست کی کہ چونکہ ان کا دفتر دہلی پولیس کے حوالے سے آئینی و انتظامی نگرانی رکھتا ہے، اس لیے جانچ کی آزادی میں مداخلت کیے بغیر، یوتھ کانگریس کارکنان کے علامتی سیاسی اظہار کے جمہوری حق کو مدنظر رکھتے ہوئے عوامی مفاد اور آئینی توازن قائم رکھا جائے۔ اگر پولیس قانون کے تحت غیر جانبداری اور انصاف کے ساتھ کام کرے گی تو آئین پر عوام کا اعتماد مزید مضبوط ہوگا۔