شیفالی زری والا کی موت کا معاملہ، پولیس نے شوہر اور دیگر 3 افراد کے بیانات درج کیے

معروف اداکارہ اور ماڈل شیفالی زری والا کی اچانک موت کے بعد ممبئی پولیس نے تفتیش کا دائرہ وسیع کر دیا ہے۔ گزشتہ شب انتقال کے بعد ابتدائی طور پر یہ اطلاع دی گئی کہ موت کی وجہ دل کا دورہ تھی۔ تاہم پولیس نے معاملے کو سنجیدگی سے لیتے ہوئے مختلف زاویوں سے تحقیقات شروع کر دی ہے۔

جوہو پولیس اسٹیشن کے افسران نے ہفتے کی صبح شیفالی کے شوہر پراگ تیاگی کا بیان ان کے گھر پر ریکارڈ کیا۔ اس کے علاوہ شیفالی کے گھر میں کام کرنے والی ملازمہ، خانساماں اور ذاتی فٹنس ٹرینر سے بھی پوچھ گچھ کی گئی۔ اب تک مجموعی طور پر چار افراد کے بیانات درج ہو چکے ہیں۔

اداکارہ کی لاش پوسٹ مارٹم کے لیے کوپر اسپتال میں رکھی گئی ہے، جہاں ان کے قریبی رشتہ دار اور دوست موجود ہیں۔ اسپتال میں پولیس اہلکار تعینات ہیں اور حفاظتی انتظامات سخت کر دیے گئے ہیں۔

شیفالی کے فٹنس ٹرینر نے بتایا کہ وہ صحت کے معاملے میں نہایت محتاط تھیں۔ ان کے مطابق، ’’شیفالی باقاعدگی سے ورزش کرتی تھیں، اپنی غذا پر سختی سے قابو رکھتی تھیں اور مرگی کے دوروں کو کنٹرول میں رکھنے کے لیے علاج کی مکمل پابندی کرتی تھیں۔‘‘ ٹرینر نے بتایا کہ ان کی آخری ملاقات دو روز قبل ہوئی تھی اور اُس وقت اداکارہ بالکل معمول کے مطابق تھیں۔

ممبئی پولیس نے ابتدائی طور پر موت کو طبعی قرار دیا ہے، مگر چونکہ یہ ایک بظاہر صحت مند شخصیت کے ساتھ پیش آنے والا اچانک واقعہ ہے، اس لیے پوسٹ مارٹم رپورٹ کو خاص اہمیت حاصل ہے۔ ہفتے کی صبح فارنسک ٹیم بھی اداکارہ کے گھر پہنچی اور کئی گھنٹے شواہد اکٹھا کرنے میں گزارے۔

شیفالی زری والا کو 2002 کے مشہور گانے ’کانٹا لگا‘ سے زبردست شہرت حاصل ہوئی تھی۔ وہ کئی لائیو شوز اور رئیلٹی پروگراموں میں بھی جلوہ گر ہو چکی تھیں۔ ان کے انتقال پر فلمی دنیا میں افسوس کی لہر دوڑ گئی ہے۔

مشہور کامیڈین سنیل پال نے ان کے انتقال پر گہرے رنج و غم کا اظہار کرتے ہوئے کہا، ’’شیفالی بہت باصلاحیت اور دلکش فنکارہ تھیں، ہم نے کئی شوز ایک ساتھ کیے، ان کی موت واقعی افسوسناک ہے۔‘‘

اداکارہ کی عمر صرف 42 برس تھی۔ ان کی موت کی وجوہات جاننے کے لیے سب کی نظریں پوسٹ مارٹم رپورٹ پر مرکوز ہیں، جو آئندہ تفتیش میں رہنمائی فراہم کرے گی۔