شہزادہ الولید بن طلال جو اب قید میں ہیں

سعودی عرب میں سنیچر کی رات کو ہونے والے واقعات دنیا میں کسی بھونچال سے کم نہیں۔ سعودی عرب میں بد عنوانی کے الزام میں موجودہ وسابق وزراء اور 11 شہزادوں کو گرفتار کرلیا گیا ہے۔ایک طرح سے بتیس برس کے شہزادہ محمد بن سلمان نے ایک منظم اور طے شدہ منصوبے کے تحت ملک پر اپنے مکمل کنٹرول کے لیے بظاہر آخری رکاوٹوں کو بھی عبور کر لیا ہے۔عرب میڈیا کے مطابق نو تشکیل شدہ بد عنوان کمیٹی کے سربراہ ولی عہد محمد بن سلمان ہیں، کمیٹی نے بد عنوانی کےالزام میں 38 موجودہ اور سابق وزرا کوگرفتار کیاگیا ہے۔میڈیا رپورٹس کے مطابق گرفتار سعودی شہزادوں میں الولیدبن طلال بھی شامل ہیں، جنہوں نے دنیا کے نامور ترین مالیاتی اداروں میں سرمایہ کاری کررکھی ہے۔

شہزادہ الولید بن طلال کنگڈم ہولڈنگ کمپنی کے بانی اور چیرمین ہیں اون سٹی بینک، ٹوئٹر ، ایپل اور روٹانا گروپ میں ان کی بڑے پیمانے پر سرمایہ کاری ہے ۔

شہزدہ الولید کی پیدائش 1955 میں ہوئی تھی اور ان کے والد اس وقت کے وزیر خزانہ تھے جبکہ ان کی والدہ لبنان کے وزیر اعظم کی صاحبزادی تھیں اور وہ شاہ سعود کے پوتے ہیں والدین کی علیحدگی کے بعد شہزادہ الولید اپنی والدہ کے ساتھ لبنان میں رہےاور بعد میں امریکہ کے شہر کیلیفورنیا میں منتقل ہو گئے اور ابتدائی تعلیم وہیں حاصل کی اور ماسٹرس ڈگری نیو یارک سے حاصل کی۔تعلیم مکمل کرنے کے بعد وہ واپس سعودی عرب آگئے اور جس وقت وہ سعودی عرب واپس آئے اس وقت تیل کی قیمتوں میں زبردست اضافہ تھا ۔الولید بن طلال نے ریاض میں کنسٹرکشن کمپنی شروع کی اور تین سال کے اندر وہ فوربس میگزین کی کامیاب کاروباریوں کی لسٹ میں شامل ہو گئے۔ انہوں نے یونائٹیڈ سعودی کمرشل بینک کو خرید لیا اور اس کو سعودی کیرو بینک، سعودی امریکن بینک کے ساتھ ضم کر کے مڈل ایسٹرن بینک بنا دیا۔ 1991میں الولید نے سٹی گروپ کے کچھ حصص خرید کر سٹی بینک کو بچا لیا۔ 1997تک وہ نیوز کارپوریشن کے پانچ فیصد کے حصہ دار ہو گئے تھے ۔ 62سالہ شہزادے نے ہوٹل انڈسٹری میں اپنی جگہ بنائی اور جدہ میں سب سے اونچی بلڈنگ تعمیر کروائی ۔ شہزادہ نے ایک بڑی رقم فلاحی کاموں میں بھی خرچ کی ۔

دو سال قبل شہزادہ الولید نے ان پائلٹوں کو مہنگی گاڑیاں دینے کی پیشکش کی تھی جو پڑوسی ملک یمن پر بمباری میں حصہ لے رہے ہیں۔چند برس قبل انہوں نے ڈونلڈ ٹرمپ کے ایک ہوٹل اور ایک پرآسائش کشتی کو خرید لیا تھا۔ اس وقت ڈونلڈ ٹرمپ سیاست میں داخل نہیں ہوئے تھے۔ لیکن بعد میں ڈونلڈ ٹرمپ کے امریکی صدارتی انتخاب میں حصہ لینے کے فیصلے پر انہوں نے ٹوئٹر پر ان سے لڑائی کی۔

شہزادہ الولید بن طلال نے ٹوئٹ کیا ’ تم نہ صرف ریپبلیکن پارٹی کے لیے تذلیل کا باعث ہو ، بلکہ پورے امریکہ کے لیے بھی۔ امریکی صدارت کی دوڑ سے دستبردار ہو جاؤ کیونکہ تم کبھی نہیں جیت سکتے۔‘

جواب میں ڈونلڈ ٹرمپ نے شہزادہ الولید کی دولت کے ذرائع کا مذاق اڑایا۔ ’احمق شہزادہ ، اپنے باپ کی دولت سے امریکہ کے سیاستدانوں کو قابو کرنا چاہتا ہے۔ جب میں منتخب ہو جاؤں گا تو وہ ایسا نہیں کر سکے گا‘

لیکن بعد میں جب ڈونلڈ ٹرمپ امریکہ کے صدر منتخب ہو گئے تو شہزادے نے اپنے ٹوئٹ کے ذریعے انہیں مبارکباد بھی دی۔ ’نو منتخب صدر ، ماضی میں جو بھی اختلافات رہے ہوں ، امریکہ نے فیصلہ دے دیا ہے۔ آپ کو صدارت کی مبارکباد اور نیک خواہشات‘

شہزادوں، وزرا اور ارب پتی کاروباری شہزادہ الولید بن طلال کی گرفتاری جیسے اقدامات کو دنیا کو بدعنوانی کے خلاف ایک مہم کے طور پر دکھایا گیا ہے۔ لیکن ان واقعات سے سعودی عوام حیرت زدہ ہیں جو اچانک تبدیلیاں دیکھنے کے عادی نہیں ہیں۔

شہزادہ الولید کو حراست میں لیے جانے کی خبر آنے کے بعد کنگڈم ہولڈنگ نامی انوسٹمنٹ کمپنی کے حصص میں 9.9 اعشاریہ فیصد کمی آئی ہے۔