’بحیرہ کیسپین‘ تک پہنچی مشرق وسطیٰ کی جنگ، روس-ایران سپلائی لائن پر براہ راست حملہ، اسرائیل کا بڑا دعویٰ

مشرق وسطیٰ کی جنگ اب ایک نئے اور خطرناک موڑ پر پہنچ گئی ہے، جہاں اس کی جغرافیائی حدود تیزی سے ٹوٹتی نظر آ رہی ہیں۔ اسرائیل نے دعویٰ کیا ہے کہ اس نے پہلی بار ’بحیرہ کیسپین‘ میں حملہ کر کے روس اور ایران کے درمیان جاری اسلحے کی سپلائی لائن کو نشانہ بنایا ہے۔ اس کارروائی کو محض ایک فوجی آپریشن نہیں بلکہ ایک بڑا اسٹریٹجک پیغام سمجھا جا رہا ہے کہ جنگ اب روایتی سرحدوں سے باہر نکل چکی ہے۔

’بحیرہ کیسپین‘ جسے دنیا کا سب سے بڑا ’اِن لینڈ واٹر باڈی‘ (اندرونی آبی ذخیرہ) مانا جاتا ہے، طویل عرصے سے روس اور ایران کے درمیان ایک محفوظ راہداری کے طور پر استعمال ہوتا رہا ہے۔ یہ علاقہ امریکی بحریہ کی رسائی سے باہر تصور کیا جاتا تھا، جس سے دونوں ممالک کو بڑے خطرے کے بغیر ہتھیاروں اور ضروری سامان کی ترسیل کی سہولت ملتی تھی۔ دعویٰ ہے کہ اسی راستے کے ذریعے ڈرون، آرٹلری شیلز اور لاکھوں راؤنڈ گولہ-بارود بھیجے جا رہے تھے۔ رپورٹس کے مطابق اس راستے سے 3 لاکھ سے زائد آرٹلری شیلز اور تقریباً 10 لاکھ راؤنڈ گولہ-بارود منتقل کیے گئے ہیں۔

اس سپلائی چین میں ایران کے ’شاہد ڈرون‘ سب سے اہم کڑی بن چکے تھے۔ روس ان ڈرون کا استعمال یوکرین کے شہروں پر حملوں میں کر رہا ہے، جبکہ ایران انہیں خلیجی خطے میں امریکی ٹھکانوں اور انفراسٹرکچر کو نشانہ بنانے کے لیے استعمال کرتا رہا ہے۔ اسی نیٹورک کو توڑنے کے لیے اسرائیل نے ایران کے ’بحیرہ کیسپین‘ کے ساحل پر واقع بندرگاہ ’بندر انزلی‘ پر حملہ کیا۔ اس حملے میں جنگی جہازوں، نیول کمانڈ سنٹر، شپ یارڈ اور مرمت کی سہولیات سمیت کئی فوجی ٹھکانوں کو نشانہ بنایا گیا۔ ویڈیو شواہد میں جہازوں کی تباہی اور بھاری نقصان کے اشارے ملے ہیں۔

اس واقعے نے روس اور ایران کے بڑھتے ہوئے فوجی اتحاد کو بھی بے ظاہر کر دیا ہے۔ جنگ کے دوران روس نے ایران کو سیٹلائٹ انٹیلی جنس اور جدید ڈرون ٹیکنالوجی فراہم کی، جس سے حملوں کی درستگی میں اضافہ ہوا۔ ماہرین کا ماننا ہے کہ اس حملے کا مقصد صرف سپلائی روکنا نہیں، بلکہ ایران کی سمندری سیکورٹی کی کمزوریوں کو بھی سامنے لانا تھا۔ اس کے اثرات صرف فوجی شعبے تک محدود نہیں رہ سکتے، کیونکہ یہی راستہ گیہوں اور دیگر ضروری سامانوں کی تجارت کے لیے بھی استعمال ہوتا تھا، جس سے  فوڈ سیکورٹی پر بھی اثر پڑنے کا خدشہ ہے۔

قابل ذکر ہے کہ روس نے اس حملے کی شدید مذمت کرتے ہوئے اسے ’سویلین ٹریڈ ہب‘ پر حملہ قرار دیا ہے اور وارننگ دی ہے کہ اس سے جنگ مزید پھیل سکتی ہے۔ حالانکہ ماہرین کا خیال ہے کہ یہ اثر مستقل نہیں ہوگا، کیونکہ روس اور ایران متبادل راستے تلاش کر سکتے ہیں۔ اس کے باوجود یہ واضح ہو گیا ہے کہ اسرائیل اب دور دراز اور غیر متوقع علاقوں میں بھی حملہ کرنے کی صلاحیت کا مظاہرہ کر چکا ہے۔ اب سب سے بڑا سوال یہی ہے کہ کیا یہ محض ایک وارننگ تھی یا آنے والے وقت میں اس طرح کے مزید حملے دیکھنے کو ملیں گے۔