تہران میں تیل ڈپو پر اسرائیل کا حملہ، جوابی کارروائی میں ایران نے حیفہ کی ریفائنری کو بنایا نشانہ، لگی آگ

امریکی صدر ڈونالڈ ٹرمپ کے ذریعہ ہفتے کی رات ایران کے لیے سب سے بُری رات بنانے کے دھمکی دینے کے چند گھنٹوں بعد ہی اسرائیل نے ایران پر نئے حملے شروع کر دیئے۔ ایران کے سرکاری میڈیا کے مطابق ہفتے کی رات تہران میں ایک تیل ڈپو پرامریکہ اور اسرائیل کی جانب سے فضائی بمباری کی گئی۔ یہ ایران کے تیل انفراسٹرکچر پر پہلا بڑا حملہ تھا۔ حملے کے بعد تیل ذخیرہ کرنے والے ٹینک میں آگ لگ گئی جس کے بعد دھویں کے غبار آسمان سے باتیں کرنے لگے۔

حملے کے بعد سامنے آئی فوٹیج میں آسمان کی طرف اُٹھتے شعلے اور دھویں کے گولے دیکھے جا سکتے ہیں۔ فی الحال اس تازہ حملے سے ہونے والے نقصان کا اندازہ نہیں لگایا جا سکا ہے لیکن خیال کیا جا رہا ہے کہ یہ تہران پر اب تک کا سب سے بڑا حملہ ہے۔ ادھر ایران کی جانب سے اسرائیل پر جوابی حملوں کا سلسلہ بھی جاری ہے۔ ایرانی میڈیا کے مطابق تہران سے اسرائیل کے مختلف علاقوں کی جانب میزائل داغے گئے اور متعدد مقامات کو نشانہ بنایا گیا۔

ایران کے اسلامک انقلابی گارڈ کور (آئی آرجی سی) نے ہفتے کی رات کہا کہ اس نے تہران کی آئل تنصیب پر حملے کے جواب میں اسرائیل کے شہر حیفہ میں ایک ریفائنری پر حملہ کیا۔ ایران آئل ریفائنری اور ڈپو پر حملے کو بربریت اور دہشت گردی کی کارروائی قرار دے رہا ہے اور کئی ماہرین نے ایسے حملوں کو جنگی کارروائی قرار دیا ہے۔

ایسے حملے بین الاقوامی قوانین کے تحت جنگی جرائم کے زمرے میں آتے ہیں۔ یہ ایرانیوں کے خلاف نفسیاتی جنگ کا حصہ ہو سکتا ہے جس میں انہیں ڈرانے اور یہ باور کرانے کی کوشش کی جارہی ہے کہ ان کی حکومت انہیں بچا نہیں پائے گی۔ اسرائیل نے اس سے قبل یمن میں تیل کے بڑے ڈپو اور رہائشی انفراسٹرکچر کو نشانہ بنایا تھا۔ گزشتہ ہفتے ایران کے ایک اسکول پر ہوئے اسرائیل اور امریکہ کے مشترکہ حملے میں 100 سے زائد طالبات جاں بحق ہوگئی تھیں۔ ایرانی میڈیا فارس نیوز نے بتایا ہے کہ ایرانی حملے میں ایک ایمبولینس بھی تباہ ہو گئی ہے۔

دوسری طرف دبئی میڈیا آفس کے مطابق ایرانی ڈرون دبئی مرینا کے ایک مرینا ٹاور سے ٹکرا گیا جس کے بعد عمارت میں آگ بھڑک اٹھی۔ واقعے کے نتیجے میں ملبہ گرنے سے ایک غیرملکی شہری کی موت ہوگئی۔ عرب میڈیا کے مطابق کرد عراق میں ایربل انٹرنیشنل ایئرپورٹ کو ڈرون حملے کا نشانہ بنایا گیا جس کے بعد متعدد دھماکوں کی آوازیں سنی گئیں اور علاقے میں آگ کے شعلے بلند ہوتے دیکھے گئے۔