روس-یوکرین جنگ: نئی پابندیوں پر روس نے امریکہ کو دی دھمکی، سخت جواب کی تنبیہ

روس اور یوکرین کے درمیان جنگ جاری ہے۔ یوکرین کے شہروں پر روس لگاتار بمباری کر رہا ہے۔ ہر روز بے قصور یوکرینی شہریوں کی جانیں جا رہی ہیں۔ دوسری طرف امریکہ کے ذریعہ روس پر لگائی جا رہی پابندیوں کا کوئی اثر روس پر پڑتا ہوا دکھائی نہیں دے رہا ہے۔ حالانکہ امریکہ کے ذریعہ لگائی گئی نئی پابندیوں پر روس کا سخت رد عمل سامنے آیا ہے۔

روس کی وزارت خارجہ نے کہا ہے کہ واشنگٹن کی نئی پابندیوں کے خلاف ماسکو جوابی کارروائی کرے گا۔ وزارت کے شمالی امریکی امور کے محکمہ کے چیف الیکزنڈر ڈارچیو کا حوالہ دیتے ہوئے ایک بیان میں کہا گیا کہ ’’ہم جلد ہی مستقبل میں جوابی کارروائی کریں گے۔ روس-امریکہ تعلقات میں دراڑ کی وجہ واشنگٹن ہے۔‘‘

نیوز ایجنسی سنہوا کی ایک رپورٹ کے مطابق ڈارچیو نے کہا ہے کہ واشنگٹن کے ذریعہ کارروائی کرنا اب روزانہ کا کام ہو گیا ہے اور روس کے افسران اور ملک کے مالیاتی شعبہ کے خلاف پابندی لگانے سے یہ صاف ہو گیا ہے کہ امریکہ پابندی والی ترکیبوں سے باہر ہو گیا ہے۔ انھوں نے کہا کہ ’’روس کے خلاف اب ایک بھی جارحانہ حملے کے لیے جوابی کارروائی کی جائے گی۔ اس سے روس کے لوگ متحد ہوں گے اور دشمن کی شرمناک شکست ہوگی۔‘‘