دو سال بعد لوٹیں رمضان کی رونقیں، بازار ہوئے گلزار

نئی دہلی: عالمی وباء کورونا وائرس کی تباہ کاریوں کے درمیان دو سال بعد رمضان المبارک میں مسجدیں نمازیوں سے آباد ہیں اور بازاروں کی رونقیں پھر سے لوٹ آئی ہیں۔ بازاروں میں کھجلا، کھجور، فینی، کیلا، انار، سیب، پپیتا، تربوز، خربوزہ، لیچی اور پھلوں کا بادشاہ آم بھی ہر خریدار کو اپنی جانب متوجہ کر رہا ہے۔ سحرو افطار میں استعمال ہونے والی اشیائے خوردنی چہار جانب بڑی مقدار میں سجی ہوئی ہیں۔ حالانکہ امسال تمام چیزوں کے دام آسمان چھو رہے ہیں مگر خوشیوں کے آگے لوگوں کے چہروں پر ذرہ برابر بھی شکن نہیں ہے۔

قومی آواز کے نمائندہ نے جامع مسجد علاقے کے دکانداروں سے بات کی تو ان کا کہنا تھا کہ گذشتہ سال کے مقابلے امسال مہنگائی زیادہ ہے جو عوام کے لئے مایوس کن تو ضرور ہے لیکن پھر بھی لوگوں کی بڑی تعداد بازاروں میں آ رہی ہے۔ انہوں مزید کہا کہ جامع مسجد اور اس کے متصل جتنی بھی کھانے پینے کی دکانیں ہیں یہاں نہ صرف مسلمان بلکہ دنیا بھر سے ہر مذاہب کے ماننے والے دیر رات رونقیں دیکھنے اس لئے بھی آتے ہیں۔ لوگ آتے ہیں اور مغلائی کھانوں کا مزہ لیتے ہیں۔

فصیل بند شہر پرانی دہلی کے گلی، کوچے اور بازار رمضان کی آمد سے گلزار ہو گئے ہیں۔ جامع مسجد، چتلی قبر، ترکمان گیٹ، مٹیا محل اور بلی ماران علاقے میں دیر رات تک چہل پہل دیکھنے کو مل رہی ہے۔ علاوہ ازیں جامع مسجد دہلی روح پرور مناظر پیش کر رہی ہے اور اس کے صحن میں روزہ افطار کرنے کی غرض سے بڑی تعداد میں لوگ پہنچ رہے ہیں۔ مومنین نماز تراویح سے فارغ ہو کر سحری تک ہوٹلوں پر لذیذ پکوانوں، آئس کریم، شاہی ٹوکڑے، تلا ہوا مرغ و مچھلی کا لطف لے رہے ہیں۔

پھل فروش محمد سلیم نے کہا کہ کورونا وباء اور لاک ڈاؤن کی وجہ سے دو سال سے روزے پھیکے جا رہے تھے اور بازاروں میں ویرانی ہی ویرانی چھائی ہوئی تھی ایسا لگنے لگا تھا کہ رمضان کی رونقیں اب نہیں لوٹیں گی، بہر حال خدا کا لاکھ لاکھ شکر ہے اب زندگی پٹری پر آ چکی ہے۔ انہوں نے کہا کہ مہنگائی کے سبب خریداری میں کمی تو آئی ہے لیکن اس کے باوجود لوگ سحر و افطار کا سامان خوب خرید رہے ہیں۔

شمال مشرقی دہلی کے سیلم پور، موج پور، جعفرآباد، چوہان بانگر، برہم پوری، گوتم پوری، نور الٰہی، کردم پوری، کبیر نگر، یمنا وہار، بھجن پورا، مصطفی آباد، کھجوری، شاستری پارک، نند نگری، سیماپوری جیسے مسلم علاقوں کے بازاروں کی رونقیں قابل دید ہیں۔ بازاروں کو لائٹوں سے سجایا گیا ہے اور چہار سو خوشی کا ماحول ہے۔