غزہ سٹی کے لاکھوں لوگ شہر چھوڑنے کو نہیں تیار، اسرائیل کے حملے تیز، مزید 50 فلسطینیوں کی گئی جان

غزہ پر اسرائیل کے وحشیانہ حملے مسلسل جاری ہیں۔ جمعہ کو تازہ کارروائی میں 50 فلسطینیوں کے مارے جانے کی اطلاع ہے۔ اسرائیلی فوج غزہ شہر پر اپنے حملے مزید تیز کر چکی ہے۔ وہیں غزہ پٹی کے سب سے بڑے شہر غزہ سٹی میں رہنے والے لاکھوں لوگوں نے گھر چھوڑ کر اسرائیلی فوج کے بتائے محفوظ مقام پر جانے سے انکار کر دیا ہے۔ حماس کے گڑھ مانے جانے والے اس شہر پر اسرائیلی فوج مسلسل گولی باری اور بمباری کر رہی ہے۔ ساتھ ہی اس علاقے میں خوراک کی سپلائی بھی رکی ہوئی ہے جس سے شہریوں کو زبردست فاقہ کشی کا سامنا ہے۔

اسرائیلی حکومت نے غزہ سٹی پر قبضہ کرنے اور حملے جاری رکھنے کا اعلان کیا ہے۔ فوج کو حماس کے اثر والے اس شہر میں اسرائیلی یرغمالیوں کے قید ہونے اندیشہ ہے۔

غزہ سٹی وہ شہر ہے جس پر اسرائیلی فوج 23 مہینوں کے حملے کے بعد بھی قبضہ نہیں کر پائی ہے۔ اس کے مضافاتی علاقوں کو اسرائیلی فوج نے خالی کرا لیا ہے لیکن کثیر آبادی والے شہر میں زمینی کارروائی تیز نہیں ہو پا رہی ہے۔ وہاں کے لوگوں نے شہر کو خالی کرنے سے انکار کر دیا ہے اور اسرائیلی ظلم کے خلاف ابھی بھی ڈٹے ہوئے ہیں۔

اسرائیلی فوج فی الحال شہر کی اونچی عمارتوں کو فضائی حملوں سے تباہ کر رہی ہے۔ فوج نے حال کے دنوں میں 500 سے زیادہ علاقوں کو نشانہ بنایا ہے۔ اس درمیان غزہ پٹی میں تعینات اسرائیل کے ریزرو فورسز نے غزہ پر قبضہ کرنے تک کارروائی جاری رکھنے کا اعلان کیا ہے۔

دوسری طرف یروشلم میں ایک ہوٹل کے باہر جمعہ کو دو لوگوں کو تیز دھار اسلحہ سے حملہ کرکے زخمی کر دیا گیا۔ زخمی 50 سالہ شخص کی حالت نازک ہے جبکہ دوسرے 25 سالہ شخص کا علاج اسپتال میں جاری ہے۔