’قیمت ادا کرنی ہوگی‘، نمازِ جمعہ کے بعد ایران کے سپریم لیڈر آیت اللہ علی خامنہ ای نے امریکہ-اسرائیل کو کیا متنبہ

ایران میں جاری شدید احتجاجی مظاہروں کے درمیان رہبر اعلیٰ آیت اللہ علی خامنہ ای نے امریکہ اور اسرائیل کو اس کے لیے ذمہ دار ٹھہرایا ہے اور دونوں ہی ممالک کو سخت تنبیہ کی ہے۔ آیت اللہ علی خامنہ ای نے کہا ہے کہ ہم اپنی حد کبھی نہیں بھولتے، لیکن اگر کوئی ہم پر حملہ کرنے کی کوشش کرے گا تو اسے اس کی قیمت ادا کرنی ہوگی۔ یہ بیان ایسے وقت میں سامنے آیا ہے، جب امریکی صدر ڈونالڈ ٹرمپ نے ایران میں ضرورت پڑنے پر داخل ہونے کی کوشش کرنے کی بات کہی ہے۔

دراصل امریکہ اور ایران کے درمیان کشیدگی نئی نہیں ہے، اور اندیشہ ظاہر کیا جا رہا ہے کہ امریکی صدر ایران میں ہو رہے احتجاجی مظاہروں سے فائدہ اٹھانے کی کوشش کر سکتے ہیں۔ موجودہ حالات کو پیش نظر رکھتے ہوئے جمعہ کی نماز کے بعد عوام سے خطاب کرتے ہوئے سپریم لیڈر آیت اللہ خامنہ ای نے واضح لفظوں میں کہا کہ ’’اسرائیل اور امریکہ بڑی سازش میں مصروف ہے، لیکن اس کی سازش کامیاب نہیں ہو پائے گی۔‘‘ انھوں نے مزید کہا کہ ’’ایران کے لوگ اس سازش کو اچھی طرح سمجھتے ہیں۔ ہم امریکہ کے آگے جھکنے والے نہیں ہیں۔‘‘

اپنے خطاب کے دوران آیت اللہ علی خامنہ ای نے امریکی صدر ڈونالڈ ٹرمپ کا ذکر کرتے ہوئے اپنے عزائم بھی سامنے رکھے۔ انھوں نے کہا کہ ڈونالڈ ٹرمپ کو اپنے ملک پر توجہ دینی چاہیے۔ ان کے دباؤ میں ایران پیچھے ہٹنے والا نہیں ہے۔ سپریم لیڈر نے یہ بھی کہا کہ ایران ایک خود مختار ملک ہے۔ اگر کوئی غفلت میں ہے تو ہم پر حملہ کر کے دیکھ لے۔