اہم خبریں LIVE: ’پی ایم مودی نے منی پور کو اس کے حال پر چھوڑ دیا‘، راہل کا قافلہ روکے جانے پر کھڑگے کا رد عمل

کانگریس صدر ملکارجن کھڑگے نے اپنے ایک سوشل میڈیا پوسٹ میں لکھا ہے کہ منی پور میں راہل گاندھی کے قافلے کو بشنوپور کے پاس پولیس نے روک دیا۔ وہ راحت کیمپوں میں متاثرین سے ملنے اور تشدد سے پریشان ریاست میں راحت پہنچانے کے لیے وہاں جا رہے ہیں۔ کھڑگے نے مزید لکھا کہ پی ایم مودی نے منی پور پر اپنی خاموشی توڑنے کی زحمت نہیں اٹھائی ہے اور ریاست کو اس کے حال پر چھوڑ دیا ہے۔

منی پور کانگریس کمیٹی کے صدر میگھ چندر نے راہل گاندھی کو بشنوپور میں پولیس کے ذریعہ روکے جانے پر ناراضگی کا اظہار کیا ہے۔ انھوں نے کہا کہ ’’راہل گاندھی کے استقبال کے لیے لوگ سڑکوں پر کھڑے ہیں لیکن بشنو پور ایس پی، اے ایس پی، اے ڈی ایم اور دیگر پولیس افسران سڑکوں پر رخنہ پیدا کر رہے ہیں۔‘‘ ساتھ ہی انھوں نے منی پور کے وزیر اعلیٰ پر سنگین الزام عائد کرتے ہوئے کہا کہ ’’میں نے سنا ہے منی پور کے وزیر اعلیٰ کے ذریعہ سڑکوں کو رخنہ انداز کرنے کی ہدایت دی گئی تھی۔ وہ اس پر سیاست کر رہے ہیں۔‘‘

کانگریس لیڈر راہل گاندھی 2 دنوں کے دورہ پر منی پور پہنچ تو گئے ہیں، لیکن آج جب وہ ایئرپورٹ سے سیدھے تشدد متاثرہ افراد سے ملاقات کرنے کے لیے نکلے تو پولیس نے راستے میں ہی انھیں روک دیا۔ راہل گاندھی کا قافلہ راحتی کیمپ کی طرف بڑھ رہا تھا جب پولیس نے انھیں روکا اور کہا کہ آگے حالات بہتر نہیں ہیں۔ میڈیا رپورٹس کے مطابق راہل گاندھی کا قافلہ بشنوپور ضلع میں روکا گیا ہے۔ راہل گاندھی امپھال سے ابھی تقریباً 20 کلومیٹر ہی آگے بڑھ پائے ہیں۔

تشدد متاثرہ منی پور کے 2 روزہ دورے پر کانگریس لیڈر راہل گاندھی امپھال پہنچ گئے ہیں۔ اپنے دورہ کے دوران راہل گاندھی راحتی کیمپوں میں پناہ لیے لوگوں سے بات چیت کریں گے اور شہری سماج کے نمائندوں سے موجودہ حالات پر تبادلہ خیال کریں گے۔

ممبئی میں بارش لوگوں کے لیے آفت بن گئی ہے۔ تازہ ترین خبروں کے مطابق ممبئی میں زوردار بارش کے درمیان الگ الگ مقامات پر درخت گرنے سے تین لوگوں کی موت ہو گئی ہے۔ بتایا جاتا ہے کہ ایک موت ملاڈ، ایک گوریگاؤں اور ایک بھائے کھلا میں ہوئی ہے۔

دہلی اور این سی آر کے کئی علاقوں میں آج صبح بارش نے لوگوں کو گرمی اور اُمس سے تھوڑی راحت پہنچائی ہے۔ نوئیڈا کے کچھ علاقوں میں تو موسلادھار بارش ہوئی جس کے سبب سڑک پر آبی جماؤ کا نظارہ دیکھنے کو ملا۔

منی پور میں تقریباً دو ماہ سے حالات کشیدہ ہیں اور رہ رہ کر پرتشدد واقعات پیش آ رہے ہیں۔ اس درمیان کانگریس لیڈر راہل گاندھی دہلی ایئر پورٹ سے منی پور کے 2 روزہ دورہ کے لیے روانہ ہو گئے ہیں۔ وہ 29 اور 30 جون کو منی پور میں مختلف مقامات پر تیار ریلیف کیمپ کا دورہ کریں گے اور وہاں پناہ لیے لوگوں سے بات چیت کریں گے۔ بتایا جا رہا ہے کہ راہل گاندھی امپھال اور چراچندپور میں سول سوسائٹی کے نمائندوں سے موجودہ حالات کو لے کر بات چیت بھی کریں گے۔