اہم خبریں: میں نے کبھی ٹرینوں کو ’کورونا ایکسپریس‘ نہیں کہا... ممتا بنرجی

مغربی بنگال کی وزیر اعلیٰ ممتا بنرجی نے میڈیا سے بات چیت کرتے ہوئے کہا کہ ”11 لاکھ مہاجر مزدور پہلے ہی ریاست لوٹ چکے ہیں، 30 ہزار آنے باقی ہیں۔ میں نے کبھی ٹرینوں کو ’کورونا ایکسپریس‘ نہیں کہا، عوام نے ٹرینوں کو اس نام سے بلایا تھا۔“

مہاراشٹر کے پونے واقع ببویواڈی علاقہ میں ایک 14 سالہ لڑکے نے خودکشی کر لی۔ پولس ذرائع کا کہنا ہے کہ لڑکا کارٹون دیکھنے کی بہت ضد کرتا تھا اور دادی کو نیوز چینل دیکھنا تھا اور اس کے بچہ راضی نہیں ہوا۔ یہ دیکھ کر ماں نے غصے میں ٹی وی بند کر دیا، جس کے بعد بچے نے خودکشی کر لی۔

آر جے ڈی لیڈر تیجسوی یادو نے میڈیا سے بات چیت کرتے ہوئے کہا کہ ”کل ہم لالو جی کا یوم پیدائش ’غریب سمان دیوس‘ کے طور پر منائیں گے۔ کیک کاٹنے یا موم بتّی جلانے کی جگہ ہم غریبوں کو کھانا کھلائیں گے۔ ہم غریب، بے روزگار اور کسانوں کی فکر کرتے ہیں جب کہ ریاستی حکومت کو صرف انتخاب کی فکر ہے۔“

پنجاب حکومت کے ذریعہ گرودواروں میں پرساد اور لنگر کی تقسیم کی اجازت دیے جانے کے بعد لوگوں میں پرساد کی تقسیم شروع ہو گئی ہے۔ میڈیا ذرائع سے موصول ہو رہی خبروں کے مطابق پنجاب کے کئی گرودواروں میں پرساد کی تقسیم احتیاطی تدابیر کے ساتھ کی گئی۔

کورونا انفیکشن کی وجہ سے دہلی واقع جامع مسجد کے شاہی امام سید احمد بخاری کے پی آر او امان اللہ کا منگل کی دیر رات انتقال ہو گیا۔ ان کا علاج صفدر جنگ اسپتال میں چل رہا تھا جہاں وہ زندگی کی جنگ ہار گئے۔ ان کے انتقال کے بعد اب اس طرح کے امکانات ظاہر کیے جا رہے ہیں کہ ایک بار پھر جامع مسجد کے دروازے عام نمازیوں کے لیے بند کر دیے جائیں گے کیونکہ پہلے سے ہی اس بات پر مشورہ چل رہا تھا کہ دہلی میں کورونا کے بڑھتے معاملات کے درمیان مسجدوں کا دروازہ کھولا جانا مناسب ہے یا نہیں۔

راجستھان حکومت نے ریاست میں کورونا کے بڑھتے معاملات کو دیکھتے ہوئے ایک بار پھر سرحد سیل کرنے کا فیصلہ کیا ہے۔ حکومت کا کہنا ہے کہ سرحدوں کو ایک ہفتہ کے لیے سیل کیا جا رہا ہے لیکن اس درمیان قابل قبول پاس رکھنے والے لوگوں کو داخلے کی اجازت دی جائے گی۔

حیدر آباد کے گاندھی اسپتال میں ایک کورونا مریض کے تیماردار نے اس وقت ڈاکٹروں اور اسٹاف پر حملہ کر دیا جب اسے بتایا گیا کہ مریض کی موت ہو گئی ہے۔ اس واقعہ کے تعلق سے حملہ کرنے والے شخص کے خلاف کیس درج کر لیا گیا ہے اور پورے واقعہ کی جانچ ہو رہی ہے۔ ایک ڈاکٹر کا کہنا ہے کہ ”ایک مریض سنگین حالت میں تھا، وہ دو دنوں سے آئی سی یو میں رکھا گیا تھا لیکن آج مریض کا انتقال ہو گیا اور جب ہم نے اس کی خبر اٹینڈینٹ کو دی تو اس نے ہم پر حملہ کرنا شروع کر دیا۔“

دہلی کے نائب وزیر اعلیٰ منیش سسودیا نے ایک نیوز پورٹل سے بات چیت کرتے ہوئے اس بات کا اعلان کیا کہ فی الحال دہلی میں اسکول نہیں کھولے جائیں گے۔ انھوں نے کورونا انفیکشن کے لگاتار بڑھتے معاملوں کے پیش نظر اسکول نہیں کھولے جانے کی بات کہی اور یہ بھی کہا کہ اسکول کھول کر دوبارہ پھر اسے بند کرنے کا دہلی حکومت کوئی تجربہ نہیں کرنا چاہتی۔

جون کا مہینہ ہندوستان کے لیے خطرناک ثابت ہو رہا ہے اور گزشتہ 24 گھنٹے میں ایک بار پھر تقریباً 10 ہزار کورونا انفیکشن کے نئے معاملے سامنے آئے ہیں۔ آج صبح مرکزی حکومت کے ذریعہ جاری اعداد و شمار کے مطابق گزشتہ 24 گھنٹے میں 9985 نئے کیس سامنے آئے جب کہ 279 اموات ہوئیں۔ ملک میں اب کورونا پازیٹو معاملوں کی کل تعداد 276583 ہو گئی ہے۔ اس کے علاوہ مجموعی اموات کی تعداد 7745 تک پہنچ گئی ہے۔

ایودھیا واقع رام جنم بھومی احاطہ میں آج بھگوان شیو کا رودرابھشیک کیا جائے گا۔ بتایا جا رہا ہے کہ کچھ اہم لوگوں کی موجودگی میں پوجا کی یہ رسم ادا کی جائے گی۔ رودرابھشیک رام جنم بھومی احاطہ میں موجود کوبیر ٹیلہ میں ہوگا۔

حکومت پنجاب کی جانب سے جاری ایک بیان میں کہا گیا ہے کہ اب ریاست میں مذہبی مقامات پر کمیونٹی کچن، لنگر اور مذہبی مقامات پر پرساد تقسیم کرنے کی اجازت رہے گی۔ ساتھ ہی کہا گیا ہے کہ لنگر یا پرساد تیار کرتے اور تقسیم کرتے وقت سبھی طرح کے احتیاطی تدابیر کیے جائیں اور صفائی کا خاص خیال رکھا جائے۔