ہند-چین تنازعہ: اروناچل پردیش کے توانگ میں ہند-چین فوجیوں کے درمیان تصادم، 30 سے زائد جوان زخمی

ہندوستان اور چین کے بیچ جاری سرحدی تنازعہ کے درمیان فوجی تصادم کی خبریں سامنے آ رہی ہیں۔ اروناچل پردیش میں ہندوستان اور چین کے فوجیوں میں تصادم ہوا ہے جس میں دونوں ممالک کے فوجی زخمی ہوئے ہیں۔ ہندی نیوز پورٹل ’اے بی پی‘ نے اپنی ایک رپورٹ میں بتایا ہے کہ یہ تصادم حال ہی میں توانگ کے قریب ہوا ہے، حالانکہ اس سلسلے میں ابھی ہندوستانی فوج کے آفیشیل بیان کا انتظار ہے۔

موصولہ اطلاعات کے مطابق توانگ علاقہ میں ہوئے اس تصادم میں ہندوستان کے 30 سے زائد فوجی زخمی ہوئے ہیں، حالانکہ کسی کی حالت سنگین نہیں ہے۔ اس تصادم میں کئی چینی فوجیوں کے زخمی ہونے کی بھی خبریں سامنے آ رہی ہیں۔ اس تصادم کے بعد ہندوستان کے کمانڈرس نے امن بحالی کے لیے چینی کمانڈرس کے ساتھ فلیگ میٹنگ کی ہے۔

واضح رہے کہ اکتوبر 2021 میں بھی اروناچل پردیش کے یانگسے میں دونوں ممالک کے فوجیوں کے درمیان تنازعہ ہوا تھا، لیکن معاملہ رفع دفع ہو گیا تھا۔ 15 جون 2020 کے واقعہ کے بعد تازہ تصادم اپنی طرح کا پہلا معاملہ بتایا جا رہا ہے۔ 15 جون 2020 کو لداخ کی گلوان وادی میں چینی فوجیوں کے ساتھ ہندوستانی فوجیوں کا تصادم ہوا تھا جس میں 20 ہندوستانی فوجی شہید ہو گئے تھے اور کئی دیگر زخمی ہوئے تھے۔ اس تصادم مین چین کے بھی کئی فوجی ہلاک ہوئے تھے۔