مدھیہ پردیش: کانگریس نے قرض معافی کا دائرہ بڑھایا، اب 35 لاکھ کسان ہوں گے مستفید

مدھیہ پردیش حکومت نے کسانوں کو قرض معافی کا دائرہ بڑھا کر ایک اور بڑا قدم اٹھایا ہے۔ اب کسانوں کا یکم اپریل 2017 سے 12 دسمبر 2018 تک کا قرض معاف کیے جانے کا فیصلہ لیا گیا ہے۔ پہلے یہ فائدہ 31 مارچ 2018 تک ہی دیا جانے والا تھا۔ تازہ فیصلے سے 35 لاکھ کسانوں کو فائدہ ملے گا۔ حالانکہ انکم ٹیکس بھرنے والے کسانوں (جن کی آمدنی کے دوسرے ذرائع بھی ہیں اور ٹیکس بھرتے ہیں) کا قرض معاف نہیں ہوگا۔

کابینہ میٹنگ کے بعد پریس کانفرنس سے خطاب کرتے ہوئے وزیر جیتو پٹواری نے بتایا کہ ملک کی تاریخ میں یہ پہلا ایسا قرض معافی منصوبہ ہے جو کسی ریاستی حکومت نے نافذ کیا ہے۔ قرض معافی منصوبہ کی عمل آوری کے لیے ترقیاتی ڈویژن کے چیف ایگزیکٹیو افسر ذمہ دار ہوں گے۔ انھوں نے یہ بھی بتایا کہ 22 فروری سے قرض معافی کا سرٹیفکیٹ اور کسانوں کے اکاؤنٹ میں پیسہ بھیجا جائے گا۔