آسٹریلیا پر ہندوستان کی فتح کے بعد راہل گاندھی اور کرن رجیجو سمیت کئی سیاسی لیڈران نے بھی دی مبارکباد

روہت شرما کی قیادت والی ہندوستانی ٹیم نے آج ’چمپئنز ٹرافی 2025‘ کے سیمی فائنل میچ میں آسٹریلیا کو 4 وکٹوں سے شکست دے دی۔ ہندوستانی ٹیم کی اس فتح کے بعد کرکٹ سے جڑے ماہرین کی مبارکبادیوں کا سلسلہ تو شروع ہوا ہی ہے، کئی سیاسی لیڈران نے بھی روہت بریگیڈ کو مبارکباد پیش کی ہے۔ سیمی فائنل میں ملی یہ جیت ہندوستانی ٹیم کے لیے بہت اہم اس لیے ہے، کیونکہ یہی آسٹریلیا ہے جس نے نومبر 2023 میں یک روزہ عالمی کپ کے فائنل مقابلے میں ہندوستان کو شکست دے کر کروڑوں ہندوستانیوں کا دل توڑ دیا تھا۔ آج جب ہندوستانی ٹیم نے اس شکست کا بدلہ لے لیا ہے، تو پورا ملک جشن میں ڈوبا نظر آ رہا ہے۔ آتش بازیاں ہو رہی ہیں اور ساتھ ہی چمپئنز ٹرافی کے فائنل میں جیت کی دعائیں بھی شروع ہو گئی ہیں۔

ہندوستان کی جیت کے فوراً بعد ملک کی اہم اپوزیشن پارٹی کانگریس نے ٹیم کو فائنل میں پہنچنے کی مبارکباد پیش کی۔ سوشل میڈیا پلیٹ فارم ’ایکس‘ پر کیے گئے ایک پوسٹ میں کانگریس نے لکھا ہے کہ ’’ہندوستانی کرکٹ ٹیم آسٹریلیا کو شکست دے کر چمپئنز ٹرافی کے فائنل میں پہنچ گئی ہے۔س بھی کھلاڑیوں کی بہترین کارکردگی سے ہندوستانی ٹیم نے یہ ’وراٹ‘ (بڑی) جیت حاصل کی ہے۔‘‘ مبارکبادی کے اس پیغام میں ’وراٹ‘ لفظ کا استعمال کر کانگریس نے وراٹ کوہلی کی 84 رنوں کی شاندار اننگ کی تعریف کی ہے۔

کانگریس نے اپنے پوسٹ میں چمپئنز ٹرافی فائنل کے لیے نیک خواہشات بھی پیش کی ہے۔ اس نے لکھا ہے کہ ’’(سیمی فائنل میں) اس شاندار کارکردگی کے لیے سبھی کھلاڑیوں کو مبارکباد اور فائنل کے لیے ٹیم کو نیک خواہشات۔‘‘ لوک سبھا میں حزب اختلاف کے قائد راہل گاندھی نے بھی ہندوستان کی اس تاریخی جیت کو قابل فخر قرار دیا ہے۔ انھوں نے اپنے ’ایکس‘ ہینڈل پر لکھا ہے کہ ’’ہندوستانی ٹیم کی ایک اور شاندار فتح۔ یہ مہارت، عزم اور ٹیم ورک کی ایک حقیقی مثال ہے۔‘‘ روہت شرما کی قائدانہ صلاحیت کا تذکرہ کرتے ہوئے وہ لکھتے ہیں کہ ’’یہ روہت شرما کی شاندار قیادت اور وراٹ کوہلی کا اپنے مزاج کے مطابق نمایاں انداز میں کھیلنے کا نتیجہ ہے۔‘‘ ساتھ ہی انھوں نے ہندوستانی ٹیم کے کھلاڑیوں سے چمپئنز ٹرافی گھر لانے کی اپیل بھی کی ہے، اور لکھا ہے کہ ’’عظمت سے بس ایک قدم دور۔‘‘

مرکزی وزیر اور بی جے پی کے سینئر لیڈر کرن رجیجیو نے روہت شرما کو ان کی ایک خاص کامیابی کے لیے مبارکباد پیش کی ہے۔ انھوں نے ’ایکس‘ پر کیے گئے اپنے پوسٹ میں لکھا ہے کہ ’’روہت شرما پر فخر ہے جو تمام 4 بڑے آئی سی سی مینس ٹورنامنٹ کے فائنل میں اپنی ٹیم کی قیادت کرنے والے پہلے کپتان بن گئے ہیں۔‘‘ دراصل روہت شرما پہلے کپتان ہیں جنھوں نے ٹی-20 عالمی کپ، یک روزہ عالمی کپ، ورلڈ ٹیسٹ چمپئن شپ اور چمپئنز ٹرافی کے فائنل میں اپنی ٹیم کو پہنچایا ہے۔