گونڈوانا ایکسپریس میں خاتون نے پھانسی لگا کر کی خودکشی، سفر کر رہا کنبہ حیران!

مدھیہ پردیش کے دموہ میں ایک افسوسناک واقعہ پیش آیا ہے۔ حضرت نظام الدین-جبل پور گونڈوانا ایکسپریس کے جنرل کوچ میں بیت الخلاء کے اندر ایک خاتون کی لاش لٹکی ہوئی برآمد ہوئی ہے۔ دموہ سرکاری ریلوے پولیس (جی آر پی) کو اس بارے میں مطلع کیا گیا اور ٹرین کے دموہ پہنچنے پر انھوں نے ٹرین کے بیت الخلاء سے خاتون کی لاش باہر نکالی۔

شروعاتی جانچ میں پتہ چلا ہے کہ خاتون کی عمر 35 سال اور اس کا نام بائی اتھیا ہے۔ ابتدائی جانچ میں پتہ چلا ہے کہ اس خاتون نے خودکشی کی ہے، حالانکہ اس کی وجہ سامنے نہیں آئی ہے۔ بیت الخلاء میں مردہ خاتون کے گلے میں ساڑی کا ایک ٹکڑا بندھا ہوا ملا تھا جو پائپ سے جڑا ہوا تھا۔ بائی اتھیا اپنے شوہر، بچوں اور کچھ دیگر جانکاروں کے ساتھ دہلی سے دموہ جا رہی تھی۔ سفر کے دوران اس کے لاپتہ ہونے کے بعد رشتہ داروں و دیگر لوگوں نے تلاش شروع کی اور پھر بیت الخلاء میں لاش دکھائی دی۔

بتایا جاتا ہے کہ رات میں ہی خاتون اچانک غائب ہو گئی تھی اور جب گھر والوں نے دیر تک اسے نہیں دیکھا تو پوری ٹرین میں اس کو تلاش کرنے کا عمل شروع ہوا۔ کافی دیر تلاشی کے بعد لوگوں نے بیت الخلاء میں تلاش کرنا شروع کیا اور وہاں اسے مردہ دیکھ کر سبھی حیران رہ گئے۔

پولیس نے خاتون کی لاش کو قبضہ میں لے لیا ہے اور پوسٹ مارٹم کے لیے بھیج دیا گیا ہے۔ جی آر پی پولیس کے مطابق معاملہ خودکشی کا ہی معلوم پڑ رہا ہے۔ پوسٹ مارٹم کے بعد جانچ آگے بڑھے گی۔ خودکشی کے پیچھے کی وجہ اب تک سامنے نہیں آ پائی ہے۔