اتر پردیش اسمبلی کا سرمائی اجلاس 19 دسمبر سے، ایس آئی آر پر ہنگامے کے آثار، ضمنی بجٹ بھی پیش کرنے کی تیاری

اتر پردیش اسمبلی کے دونوں ایوانوں کا سرمائی اجلاس 19 دسمبر 2025 سے شروع ہوگا۔ اس سلسلے میں گورنرآنندی بین پٹیل کے ذریعہ جمعہ کو حکومت کی تجویز پر مہرلگنے کے بعد اسمبلی کے پرنسپل سکریٹری پردیپ کمار دوبے اور قانون ساز کونسل کے پرنسپل سکریٹری ڈاکٹر راجیش سنگھ نے نوٹیفکیشن جاری کردیا ہے۔

اتر پردیش کابینہ نے حال ہی میں 19 دسمبر کو اسمبلی اجلاس بلانے کا فیصلہ کیا تھا، جسے گورنر نے منظوری دے دی ہے۔ نوٹیفکیشن کے مطابق گورنر نے دونوں ایوانوں کو 19 دسمبر کو صبح 11 بجے سال 2025 کے تیسرے اجلاس کے لیے طلب کر لیا ہے۔ تاریخ کے لحاظ سے ایک تفصیلی شیڈول ابھی جاری نہیں کیا گیا ہے لیکن ذرائع بتاتے ہیں کہ سیشن 24 دسمبر تک چلے گا، جس میں 6 کیلنڈر دن شامل ہوں گے۔ حالانکہ 21 دسمبر کو اتوار ہونے کی وجہ سے چھٹی ہوگی، جس کے نتیجے میں کام کے دن کل 4 یا 5 رہ جائیں گے۔ اس مختصر لیکن اہم اجلاس میں یوگی آدتیہ ناتھ حکومت مالی سال 26-2025 کے لیے پہلا ضمنی بجٹ پیش کرنے کی تیاری کر رہی ہے۔

وہیں اترپردیش قانون ساز اسمبلی کے سرمائی اجلاس کے دوران ایوان میں ہنگامہ آرائی کا بھی امکان ہے۔ اپوزیشن پارٹیاں خاص طور پر سماج وادی پارٹی اور کانگریس اسپیشل انٹینسیو ووٹر ریویژن (ایس آئی آر) مہم پر حکومت کو گھیرنے کی حکمت عملی بنا رہی ہیں۔ مہنگائی، بے روزگاری، کسانوں کے مسائل، امن و امان اور دیگر عوامی خدشات جیسے مسائل پر بھی زبردست بحث کی توقع ہے۔

اپوزیشن کا خیال ہے کہ مختصر سیشن گہرائی سے بات چیت کے لیے کم موقع فراہم کرتے ہیں اور بہت سے مسائل حل طلب رہ جاتے ہیں۔ ایوان کی کارروائی کے پہلے دن انتقال کرجانے والے ارکان کو خراج عقیدت پیش کیا جائے گا۔ یہ اجلاس ریاست کی ترقی اور قانون سازی کے کاموں کے لیے انتہائی اہم سمجھا جاتا ہے۔