کشمیر: اننت ناگ میں ایک شخص کی رہائش گاہ سے جنگلی جانوروں کی کھالیں اور جسمانی اعضا برآمد

سری نگر: محکمہ وائلڈ لائف اور پولیس کی ایک ٹیم نے ہفتے کے روز جنوبی کشمیر کے ضلع اننت ناگ کے شیر پورہ علاقے میں ایک شخص کو گرفتار کرکے اس کی تحویل سے چیتوں کی کھالیں اور دیگر جنگلی جانوروں کے جسمانی اعضا کو بر آمد کیا۔ سرکاری ذرائع نے بتایا کہ محکمہ وائلڈ لائف اور پولیس کی ایک مشترکہ پارٹی نے ہفتے کے روز ضلع اننت ناگ کے شیر پورہ علاقے میں چھاپے کے دوران ایک شخص کی رہائش گاہ سے چیتے کی کھالوں کے علاوہ کچھ جنگلی جانوروں کے جسمانی اعضا بر آمد کٰیے۔

انہوں نے کہا کہ بر آمدہ شدہ اشیا میں 8 چیتوں کی کھالیں، 4 ہرنوں کے تخم دانیوں اور 38 ریچھوں کے گال بلیڈرس شامل ہیں۔ ان کا کہنا تھا کہ مذکورہ شخص، جس کو گرفتار کیا گیا ہے، کی شناخت گل محمد گنائی ولد عبدالرحمان گنائی ساکن شیر پورہ کے بطور ہوئی ہے۔

وائلڈ لائف وارڈن اننت ناگ روف زرگر نے واقعے کی تصدیق کرتے ہوئے کہا ہے کہ گزشتہ روز ہمیں اس سلسلے میں ایک اطلاع موصول ہوئی جس پر کارروائی کرتے ہوئے ہم نے چھاپہ مار کر یہ جنگلی جانوروں کی کھالیں اور ان کے جسمانی اعضا بر آمد کیے۔ انہوں نے کہا کہ جو ریچھوں کے گال بلیڈرس بر آمد ہوئے ہیں وہ غالباً آٹھ سال پرانے ہیں۔

دریں اثنا کشمیر زون پولیس نے اپنے آفیشل ٹوئٹر ہینڈل پر ایک ٹوئٹ میں کہا ہے کہ ’وائلڈ لائف کرائم کنٹرول بیورو (ڈبلیو سی سی بی) نئی دلی کی ایک اطلاع کے مطابق ڈبلیو سی سی بی، فارسٹ، اننت ناگ پولیس اور سی آر پی ایف کی ایک مشترکہ ٹیم نے اننت ناگ میں چھاپے کے دوران 8 چیتوں کی کھالوں، 38 ریچھوں کے گال بلیڈرس اور 4 ہرنوں کے تخم دانیوں کو بر آمد کیا۔ اس سلسلے میں ایک شخص کو گرفتار کرکے کیس درج کیا گیا اور تحقیقات شروع کی گئی‘۔