راہل گاندھی کہاں تھے؟ کانگریس نے ویڈیو کے ذریعے دیا ناقدین کو جواب

نئی دہلی: کانگریس کے سابق راہل گاندھی کے ناقدین اکثر یہ سوال اٹھاتے ہیں کہ اہم واقعات کے وقت راہل گاندھی غائب رہتے ہیں، جبکہ حقیقت یہ ہے کہ ملک میں جب بھی کسی کے ساتھ ظلم ہوا ہے راہل گاندھی اس کے ساتھ کھڑے نظر آئے۔ کانگریس پارٹی نے راہل گاندھی سے ان کی موجودگی کے بارے میں سوال کرنے والوں کو خاموش کرانے کے لئے ایک ویڈیو جاری کیا ہے۔ تقریباً 2.50 منٹ کی ویڈیو میں پارٹی نے کہا ملک میں ایک ایسا طبقہ ہے جو حکومت مخالف نظر تو آتا ہے لیکن سوال بالخصوص راہل گاندھی سے پوچھتا ہے۔"

ویڈیو میں ایسے متعدد واقعات دکھائے گئے ہیں جن میں کسی نہ کسی شخص یا طبقہ کے ساتھ ناانصافی ہو رہی ہے اور راہل گاندھی مظلوم کی حمایت میں احتجاج کر رہے ہیں یا متاثرین سے ملاقات کر رہے ہیں۔ ویڈیو میں بھٹہ پارسل کی تصویریں ہیں جہاں راہل نے حصول اراضی قانون کے حوالہ سے اس وقت کی اتر پردیش حکومت کے خلاف محاذ کھولا تھا۔ اس کے علاوہ راہل گاندھی ہاتھرس، دھاراوی اور لکھیم پور کھیری میں بھی متاثرین سے ملاقات کرنے کے لئے جا رہے ہیں۔

ویڈیو میں راہل گاندھی کو کئی احتجاجی مظاہروں کی قیادت کرتے ہوئے دکھایا گیا ہے۔ دراصل، جہانگیر پوری میں تشدد کے بعد بہت سے لوگوں نے ان کی عدم موجودگی پر سوال اٹھائے ہیں۔ کانگریس لیڈروں کا کہنا ہے کہ راہل سے سوال کیوں کیا جا رہا ہے جبکہ سوال حکومت سے پوچھا جانا چاہیے۔

کانگریس کے سوشل میڈیا سربراہ روہن گپتا نے کہا کہ یہ ویڈیو ان لوگوں کے لیے ہے جو کہہ رہے ہیں کہ راہل گاندھی کہیں نہیں ہیں، جبکہ حقیقت یہ ہے کہ وہ ہر جگہ ہیں۔ کورونا کے دوران بھی وہ یہیں تھے۔ اس لیے لوگوں کو معلوم ہونا چاہیے کہ ان کے خلاف جھوٹا پروپیگنڈہ کیا جا رہا ہے۔