سردار پٹیل کا مجسمہ: مودی کا خواب ملک کو کتنا مہنگا پڑا؟ جانیں

گجرات کے نرمدا ضلع میں پولس نے منگل کے روز متعدد آدیواسی کارکنان کو اس وقت گرفتار کیا جب اگلے دن یعنی کہ آج وزیر اعظم نریندر مودی سردار ولبھ بھائی پٹیل کے دنیا کے سب سےبڑے مجسمہ کا افتتاح کرنے جا رہے تھے۔

آدیواسی کارکنان کو کیواڈیا، راج پیپلا اور ڈیڈی پاڈا تعلقہ میں گرفتار کیا گیا ہے، سردار پٹیل کے مجسمہ کا نام ’اسٹیچو آف یونیٹی ‘ یعنی مجسمہ اتحاد رکھا گیا ہے۔ اسٹیچو آف یونیٹی کو بنانے میں 3 ہزار کروڑ روپے خرچ ہوئے ہیں ، اس کی بلندی 182 میٹر ہے جو کہ دنیا کے تمام مجسموں میں سب سے زیادہ ہے۔

اسٹیچو آف یونیٹی کو بنانے میں بظاہر تو 3 ہزار کروڑ روپے خرچ ہوئے ہیں لیکن یہ عوام کے لئے اس سے کہیں زیادہ مہنگا پڑا ہے، جانتے ہیں کیسے؟

اسٹیچو آف یونیٹی کو سردار سروور ڈیم کی 3 کلومیٹر اراضی پر تعمیر کیا گیا ہے، جس کی وجہ سے تقریباً 35000 خاندان متاثر ہوئے ہیں اور تاحال باز آبادکاری کا انتظار کر رہے ہیں۔

دنیا کا بلند ترین مجسمہ ماحول پر بری طرح اثر ڈالے گا کیوں کہ اسے شول پنیشور نامی نہایت حساس سینچری کے دائرے میں تعمیر کیا گیا ہے، اوپر سے اس سے ہونے والے ممکنہ نقصانات کا کوئی اندازہ نہیں لگایا گیا۔ اتنا ہی نہیں مجسمہ تک جانے کے لئے جو 6 لین کا ہائی وے تعمیر کیا گیا ہے اس کے لئے تقریباً 2 لاکھ درختوں کی بلی چڑھا دی گئی ہے۔

نرمدا ضلع کی زمین پانچویں شیڈیول میں شامل ہے، آئین کے مطابق جو زمین پانچویں شیڈیول میں شامل ہے اس کے لئے گرام سبھا سے منظوری لینی لازمی ہوتی ہے، لیکن گجرات حکومت نے متعلقہ گاؤوں کی گرام سبھاؤں سے کوئی منظوری حاصل نہیں کی۔

پیر کے روز یعنی 29 اکتوبر کوسردار سروور ڈیم کے نزدیک واقع 22 گاؤں کے پردھانوں نے مودی کے نام خط لکھ کر کہا ہے کہ وہ مجسمہ کی افتتاحی تقریب کے دوران ان کا استقبال نہیں کریں گے۔ ادھر آدیواسی رہنماؤں نے بھی تقریب کا بائیکاٹ کیا تھا، کیونکہ ان لوگوں کا الزام ہے کہ مجسمہ کی تعمیر سے قدرتی وسائل کو نقصان پہنچے گا۔

قبل ازیں آدیواسی کارکنان یہ اعلان کر چکے تھے کہ ڈیم کے نزدیک واقع 72 گاؤں کے لوگ 31 اکتوبر 2018 کو یو م غم منائیں گے اور احتجاجاً کھانا نہیں بنائیں گے۔ آدیواسی مجسمہ کے خلاف احتجاج کے طور پر اپنے خون سے بھی خط لکھ چکے ہیں۔