مشرق وسطیٰ میں جنگ: خلیج کی فضائی حدود بند ہونے سے ہندوستان میں 350 پروازیں منسوخ

 مشرق وسطیٰ میں شدید بحران نے ہندوستان کی فضائی خدمات کو بھی متاثر کیا ہے۔ اندرا گاندھی انٹرنیشنل ایئرپورٹ (آئی جی آئی)، ممبئی ایئرپورٹ سمیت ملک کے مختلف ہوائی اڈوں سے آنے اور جانے والی تقریباً 350 پروازوں کو منسوخ کر دیا گیا ہے۔ جس کی وجہ سے مختلف ہوائی اڈوں پر مسافر پھنس گئے ہیں۔ اطلاعات کے مطابق اتوار کو دیر شام تک صرف دہلی ایئر پورٹ پر 100 سے زائد بین الاقوامی پروازیں منسوخ کر دی گئیں۔

موجودہ حالات کے پیش نظر آئی جی آئی ایئرپورٹ انتظامیہ نے دیر رات مسافروں کے لیے ایک اہم ایڈوائزری جاری کی جس میں خبردار کیا گیا کہ مغربی ممالک کے لیے بین الاقوامی پروازوں میں تاخیر اور نظام الاوقات میں تبدیلیاں ہو سکتی ہیں۔ ایئر پورٹ ذرائع کا کہنا ہے کہ موجودہ حالات کے پیش نظر کچھ بین الاقوامی پروازوں کو متبادل روٹ سے چلایا جا سکتا ہے وہیں کچھ پروازوں کے وقت میں تبدیلی ہونے کا بھی امکان ہے۔

اطلاعات کے مطابق اتوار کو دہلی ایئرپورٹ سے کم سے کم 100 بین الاقوامی پروازیں منسوخ کردی گئیں۔ ان میں 60 روانگی (ڈپارچر) اور 40 آمد(آرائیول) شامل ہیں۔ اسی طرح ممبئی ایئرپورٹ سے 125 پروازوں کو منسوخ کیا گیا جن میں 67 روانگی اور 58 آمد شامل ہیں۔ اس کے علاوہ امرتسرانٹرنیشنل ایئرپورٹ سے مشرق وسطیٰ سے براہ راست منسلک 10 پروازوں کو منسوخ کرنے کا فیصلہ کیا گیا۔ جن میں قطر ایئرویز، ایئر انڈیا ایکسپریس، اسپائس جیٹ اور انڈیگو کے ذریعے دبئی، دوحہ اور شارجہ کے راستوں پر چلنے والی متعدد پروازیں شامل ہیں۔   

فضائی خدمات کے متاثر ہونے کی بڑی وجہ ایران پر اسرائیل اورامریکہ کا مشترکہ فوجی حملہ ہے جس کے بعد مشرق وسطیٰ میں کشیدگی اپنی انتہا کو پہنچ چکی ہے۔ امریکہ اور اسرائیل کے حملے میں ایران کے سپریم لیڈرآیت اللہ علی خامنہ ای کی شہادت کے بعد جہاں دنیا بھر میں غم وغصہ پھیل گیا ہے وہیں ایران کی جانب سے جوابی کارروائی کے طور پر مشرق وسطیٰ کے کئی ممالک میں واقع امریکہ کے فوجی ٹھکانوں پر حملے جاری ہیں۔ موجودہ صورتحال کے پیش نظر مشرق وسطیٰ کے متاثرہ ممالک نے اپنی فضائی حدود بند کردی ہیں۔

اس دوران ایئر انڈیا نے اتوار کو 22 اضافی بین الاقوامی خدمات منسوخ کر دی ہیں، جس سے اس کی بیرون ملک پروازوں کی منسوخی کی تعداد 50 ہو گئی ہے۔ وہیں اسپائس جیٹ نے یکم اور 2 مارچ کو طے شدہ 33 پروازیں منسوخ کر دی ہیں، جبکہ انڈیگو نے یکم اور 4 مارچ کے درمیان 470 سے زیادہ پروازیں منسوخ کرنے کا فیصلہ کیا ہے۔ ایئر انڈیا ایکسپریس نے بحرین، کویت، عمان، قطر، سعودی عرب اور متحدہ عرب امارات کے لیے بھی 2 مارچ کی رات 11:59 بجے تک 17 پروازیں منسوخ کردی ہیں جن میں 16 ڈپارچر شامل ہیں۔