دہلی کانگریس دفتر میں چلائی گئی راہل گاندھی کی پریس کانفرنس والی ویڈیو، ووٹ چوری کے خلاف آواز اٹھانے کی اپیل

نئی دہلی: دہلی کانگریس صدر دیویندر یادو نے آج دہلی کانگریس دفتر میں اُس ویڈیو ایل ای ڈی اسکرین پر چلایا جس میں کانگریس رکن پارلیمنٹ اور لوک سبھا میں قائد حزبِ اختلاف راہل گاندھی نے بی جے پی اور الیکشن کمیشن کی مبینہ ووٹ چوری کی سازش کا انکشاف کیا تھا۔ اس ویڈیو کو دکھائے جانے سے قبل کمیونیکیشن ڈپارٹمنٹ کے چیئرمین انیل بھاردواج نے وہاں موجود لیڈروں اور عہدیداروں سے ووٹ چوری کے معاملہ پر تبادلہ خیال کرتے ہوئے کہا کہ ’’جہاں مودی جی ’من کی بات‘ کرتے ہیں، وہیں عوامی ہیرو راہل گاندھی ’جَن (عوام) کی بات‘ کرتے ہیں۔‘‘

اس تقریب میں جن اہم شخصیات نے شرکت کی ان میں سابق ممبر پارلیمنٹ کرشنا تيرتھ، دہلی کے سابق وزراء ڈاکٹر نریندر ناتھ، منگت رام سنگھل، کرن والیا، ریاستی ایڈمنسٹریٹو انچارج جتن شرما، ضلع صدر سدھارتھ راؤ، آدیش بھاردواج، ہرش چودھری، لوک سبھا و ضلع مبصرین سی پی متل، جگجیون شرما، ڈاکٹر پی کے مشرا، جتندر کمار کوچر، محمد عثمان، لکشمن راوت، آبھا چودھری، راج کمار جین، رمیش سبروال، مرزا جاوید علی اور سنجے نیرج وغیرہ شامل تھے۔

اس موقع پر دیویندر یادو نے کہا کہ الیکشن کمیشن کی معاونت سے بی جے پی نے غیر قانونی طور پر انتخابات جیت کر اقتدار حاصل کیا ہے۔ راہل گاندھی نے ثبوتوں کے ساتھ یہ سب عوام کے سامنے پیش کیا ہے کہ کس طرح ووٹ چوری کے ذریعے بی جے پی جمہوریت اور آئین پر براہِ راست حملہ کر رہی ہے۔ انہوں نے کہا مزید کہا کہ ہمیں راہل گاندھی جی کی مہم 'I support Rahul Gandhi’s demand of Digital Voter Rolls from EC' سے جڑنا ہے اور ملک کی خود مختاری سے کھیلنے والوں کے خلاف بھرپور مہم چلا کر راہل گاندھی کے مضبوط ارادوں کو تقویت دینی ہے تاکہ ہم آخر تک جمہوریت اور آئین کی حفاظت کے لیے لڑ سکیں۔

دیویندر یادو نے کانگریس کارکنوں سے اپیل کی کہ وہ آل انڈیا کانگریس کمیٹی کی جانب سے فراہم کردہ لنک پر جا کر ڈیجیٹل ووٹر لسٹ کی مانگ کے لیے رجسٹریشن کریں اور بی جے پی و الیکشن کمیشن کے ووٹ چوری کے معاملے کے خلاف اس جدوجہد میں شریک ہو کر ملک کو بچانے میں اہم کردار ادا کریں۔ ان کا کہنا ہے کہ آج دہلی کے ہر کارکن کو تنظیم کی طاقت دکھانے کا وقت ہے۔ ہمیں آل انڈیا کانگریس کمیٹی کے ہر پروگرام میں متحد ہو کر لڑنا ہوگا۔ ووٹ چوری کا معاملہ صرف کانگریس کا نہیں بلکہ پورے ملک کے ہر شہری سے جڑا ہوا ہے۔ ہمیں منظم ہو کر بی جے پی کی سازشوں کو ہر سطح پر بے نقاب کرنا ہوگا، چاہے ذاتی سطح پر، زمینی سطح پر یا سوشل میڈیا پلیٹ فارم پر، سبھی جگہ اس معاملے میں بڑے پیمانے پر گفتگو ہونی چاہیے۔

کمیونیکیشن ڈپارٹمنٹ کے چیئرمین انیل بھارواج نے اس موقع پر کہا کہ ’’یہ ملک اور اس کے شہریوں کے لیے ایک بہت بڑا بدقسمتی کا لمحہ ہے کہ کچھ لوگ ملک کو فروخت کر رہے ہیں اور ووٹ چوری کر کے عوام کے جمہوری اقدار کا مذاق اڑا رہے ہیں۔‘‘ انہوں نے مزید کہا کہ اگرچہ راہل گاندھی نے ایک مخصوص حلقے کی ووٹر لسٹ کا انکشاف کیا ہے، لیکن ووٹ چوری کا اثر پورے ملک پر ہوا ہے۔ ووٹ چوری کے باعث وہ نمائندے منتخب نہیں ہو پا رہے جنہیں عوام واقعی چاہتی ہے۔ بی جے پی اقتدار حاصل کرنے کے لیے جمہوری نظام کا غلط استعمال کر رہی ہے اور آئین کو نقصان پہنچا رہی ہے۔