اترپردیش: پردھان کی میعاد میں ایک سال توسیع ممکن، پنچایت انتخابات ملتوی ہونے سے انتظامی کمیٹی سنبھال سکتی ہے ذمہ داری

اترپردیش میں پنچایت انتخابات کے حوالے سے تقریباً ایک سال قبل سے ہی ممکنہ امیدواروں کی سرگرمیاں شروع ہو گئی تھیں اور اور مئی میں انتخابات کی تاریخوں کا اعلان ہونے کی باتیں کی جا رہی تھیں مگر اب ایسا ظاہر ہو رہا ہے کہ ریاست میں پنچایت انتخابات اپنے مقررہ وقت پر نہیں ہو سکیں گے۔ ایسی صورت میں گرام پردھانوں کی میعاد میں تقریباً ایک سال کی توسیع کی جا سکتی ہے کیونکہ گرام پردھانوں کی مدت کار 26 مئی کو ختم ہورہی ہے اور تب تک الیکشن ہونے کی کوئی امید نظر نہیں آرہی ہے۔

اس دوران کہا جارہا ہے کہ 26 مئی کو اتر پردیش کی گرام پنچایتوں کی باگ ڈور انتظامی کمیٹی کے حوالے کی جا سکتی ہے، جس میں گرام پردھان اور دیگر اراکین شامل ہوں گے۔ گرام پنچایتوں میں افسروں کو براہ راست ایڈمنسٹریٹر کے طور پر تعینات نہیں کیا جائے گا۔ پنچایتی راج ایکٹ کے تحت گرام پنچایتوں کی میعاد 5 سال ہونے اور وقت پر انتخابات نہ ہونے کی صورت میں الگ التزام ہے۔

عام طور پر ہر گرام پنچایت میں اے ڈی او پنچایت کے طور پر ذمہ داری دی جاتی ہے لیکن دوسرا طریقہ یہ بھی ہے کہ انتظامی کمیٹی کے ذریعہ زیادہ جمہوری طریقے سے پنچایتوں کا کام کاج چلایا جائے۔ اس کمیٹی میں گاؤں کے پردھان، پنچایت ممبران کے علاوہ انتظامی افسران بھی شامل ہوتے ہیں۔ ایسی صورت میں اس طرح کے متبادل کا امکان ہے تاکہ گرام پردھانوں میں ناراضگی بھی پیدا نہ ہو۔

انتظامی کمیٹی کا سربراہ بھی گرام پردھان کو بنایا جاسکتا ہے۔ یوپی پنچایتی انتخابات ہونے تک گرام پردھان کی قیادت میں یہ کمیٹی ہی تمام کام کاج انجام دیتی ہے۔ پنچایتوں میں نیا نظام 26 مئی 2026 سے پہلے ہی نافذ کر دیا جائے گا۔ پنچایتی راج کی وزارت بھی اس پر غور کر رہی ہے۔ حالانکہ الہ آباد ہائی کورٹ انتخابات کے التوا پر کیا موقف اختیار کرے گا، یہ دیکھنے والی بات ہوگی۔ 23 اپریل کو ہائی کورٹ میں ایک بار پھر سماعت ملتوی ہوگئی تھی۔ ہائی کورٹ پہلے ہی الیکشن کمیشن سے انتخابات میں تاخیر کے حوالے سے سخت سوالات کر چکا ہے۔