اُتر پردیش پنچایت انتخابات: ووٹر لسٹ کی حتمی اشاعت کی تاریخ جاری، 18 جولائی سے تیاریاں شروع

لکھنؤ: اتر پردیش میں ہونے والے آئندہ پنچایت انتخابات کے سلسلے میں بڑی پیش رفت سامنے آئی ہے۔ ریاستی الیکشن کمیشن نے ووٹر لسٹ کی حتمی اشاعت کے لیے نوٹیفکیشن جاری کر دیا ہے۔ اس کے مطابق پنچایت انتخابات کی رسمی تیاریاں 18 جولائی 2025 سے شروع ہو جائیں گی، جبکہ ووٹر لسٹ کا حتمی اشاعت 15 جنوری 2026 کو کیا جائے گا۔ اس کے بعد مارچ 2026 میں پنچایت انتخابات کے انعقاد کا امکان ہے۔

ریاستی الیکشن کمیشن کے او ایس ڈی اور آئی اے ایس افسر ڈاکٹر اکھیلیش مشرا نے تمام ضلع مجسٹریٹس کو ہدایت نامہ جاری کرتے ہوئے ووٹر لسٹ کی تیاریوں کو سنجیدگی سے انجام دینے کا حکم دیا ہے۔ شفاف اور غیرجانبدار انتخابات کو یقینی بنانے کے لیے حکام کے تبادلوں پر فی الحال روک لگا دی گئی ہے۔

ووٹنگ لسٹ میں ترمیم کا عمل جون 2025 سے ہی شروع ہو چکا ہے۔ اس دوران فوت شدہ افراد کے نام ووٹر لسٹ سے ہٹانے اور نئے اہل ووٹروں کے نام شامل کرنے کا کام جاری ہے۔ اس عمل میں بوتھ لیول افسران (BLOs) اور نگران عملے کی تعیناتی کا سلسلہ بھی شروع ہو چکا ہے۔

یہ انتخابات گرام پردھانوں، علاقائی پنچایت (بلاک) ممبران اور ضلع پنچایت صدر کے انتخاب کے لیے نہایت اہم ہیں، جنہیں اکثر ریاستی سطح پر سیاسی نبض ناپنے کے طور پر دیکھا جاتا ہے۔

دریں اثنا، پنچایتی راج محکمہ نے گرام پنچایتوں کے نئے سرے سے تعین کا عمل مکمل کر لیا ہے۔ اس عمل کے تحت ریاست میں 512 گرام پنچایتیں کم ہو گئی ہیں، جس کے بعد اب کل 57,694 گرام پنچایتوں میں انتخابات ہوں گے۔ اس سے قبل یہ تعداد 57,695 تھی۔ نئے حلقہ بندی کے عمل میں سب سے زیادہ گرام پنچایتیں تین اضلاع—چترکوٹ، اعظم گڑھ اور دیوریا—میں کم کی گئی ہیں۔

یوپی کے 75 اضلاع، 826 بلاکس اور 57 ہزار سے زائد گرام پنچایتوں میں ہونے والے یہ انتخابات سیاسی طور پر خاصے اہم ہیں، کیونکہ انہیں 2027 کے اسمبلی انتخابات سے پہلے ایک 'سیمی فائنل' سمجھا جا رہا ہے۔ تمام سیاسی جماعتیں اس موقع کو سنجیدگی سے لے رہی ہیں اور گاؤں کی سطح پر اپنی گرفت مضبوط کرنے میں لگی ہوئی ہیں۔

ریاستی الیکشن کمیشن کی جانب سے اعلان کردہ یہ ٹائم لائن انتخابی تیاریوں کو باقاعدہ رخ دے گی اور اگلے چند ماہ تک پنچایت انتخابات کی سرگرمیوں میں مزید تیزی آ جائے گی۔