مردم شماری میں تاخیر سے سماجی پالیسیوں کو نقصان، مرکز کی لاپرواہی پر کانگریس برہم

کانگریس نے دس سالہ مردم شماری نہیں کرانے کو لے کر جمعرات کو وزیر اعظم نریندر مودی کی قیادت والی این ڈی اے حکومت پر ایک بار پھر زوردار حملہ کرتے ہوئے کہا ہے کہ اس غیر ضروری تاخیر کی وجہ سے کئی سماجی پالیسیوں اور پروگراموں کو نقصان پہنچ رہا ہے۔

کانگریس کے جنرل سکریٹری جئے رام رمیش نے سوشل میڈیا سائٹ 'ایکس' پر ایک خبر ساجھا کی ہے جس میں کہا گیا ہے کہ دس سالہ مردم شماری 2021 سے التوا میں ہے۔ اس میں یہ بھی کہا گیا ہے کہ مردم شاری کے اس سال بھی ہونے کے امکان نہیں ہیں کیونکہ ملک میں پیدائش اور موت پر کم سے کم دو دیگر اہم رپورٹ گزشتہ پانچ برسوں سے مرکزی وزارت داخلہ کے ذریعہ جاری نہیں کی گئی ہے۔

جئے رام رمیش نے اپنے پوسٹ میں لکھا ہے، "دس سالہ مردم شماری، جو 2021 میں ہونے والی تھی، لیکن ابھی تک شروع نہیں کی گئی ہے۔ یہ غیر ضروری تاخیر، کئی سماجی پالیسیوں اور پروگراموں کو نقصان پہنچا رہی ہے جن میں درج فہرست ذات اور درج فہرست قبائل کے لیے ریزرویشن اور خوراک تحفظ کا حق شامل ہیں۔"

واضح ہو کہ اس سے پہلے کانگریس نے ہفتہ کو بھی کہا تھا کہ یہ بے حد مایوس کن ہے کہ وزیر مالیات نرملا سیتا رمن نے بجٹ کی تقریر میں دس سالہ مردم شماری کے لیے کسی بجٹ کے الاٹمنٹ کا ذکر نہیں کیا۔