دیوبند میں جمعیۃ علماء ہند کا دو روزہ اجلاس آج سے شروع، ملک کے موجودہ حالات پر تبادلہ خیال متوقع

دیوبند: ملک میں فرقہ وارانہ کشیدگی میں ہو رہے مستقل اضافہ کے پیش نظر جمعیۃ علماء ہند نے دیوبند میں دو روزہ اجلاس طلب کیا ہے۔ اجلاس اتر پردیش کے دیوبند میں منعقد کیا جا رہا ہے، جس میں 5 ہزار مسلم دانشور شرکت کر سکتے ہیں۔ اس اجلاس کا مقصد گیان واپی مسجد، قطب مینار اور اس طرح کی متعدد یادگاروں پر کھڑے کئے جا رہے تنازعہ پر تبادلہ خیال کرنا ہے۔

جمعیۃ کا اجلاس دیوبند کے عیدگاہ میدان پر شروع ہو چکا ہے اور اس پر سب کی نظریں ہیں کیونکہ اس میں ملک بھر سے جمعیۃ کے ہزاروں عہدیدار اور کارکنان شرکت کر رہے ہیں، جوکہ ملک کے موجودہ ماحول کے حوالے سے قرارداد منظور کریں گے۔ جمعیۃ علماء ہند مسلمانوں کی سب سے بڑی تنظیموں میں سے ایک ہے جو دو حصوں میں تقسیم ہے، جس کے ایک گروپ کی صدارت مولانا محمود مدنی ہیں اور دوسرے گروپ کی صدارت محمود مدنی کے چچا مولانا ارشد مدنی کرتے ہیں۔ دیوبند میں منعقدہ اس اجلاس کو مولانا محمود مدنی کے گروپ نے منعقد کیا ہے۔محمود مدنی راجیہ سبھا کے رکن بھی رہ چکے ہیں۔

خیال رہے کہ گیان واپی مسجد کو ہندوؤں کے حوالے کرنے اور پوجا کرنے کی اجازت دئے جانے کے لیے دائر عرضی کی سماعت کرتے ہوئے، سول جج (سینئر ڈویژن) کی عدالت نے اسے فاسٹ ٹریک کورٹ میں منتقل کر دیا ہے۔ اب معاملہ کی سماعت 30 مئی کو فاسٹ ٹریک کورٹ میں کی جائے گی۔ معاملہ فاسٹ ٹریک پر چلا جاتا ہے تو اس پر فوری یا روزانہ کی بنیاد پر سماعت کی جاتی ہے۔