ترنمول کانگریس تریپورہ میں بھی فتحیاب ہوگی: ممتا بنرجی

کولکاتا: مغربی بنگال کی وزیر اعلیٰ ممتا بنرجی نے آج یہ عزم دہرایا ہے کہ مغربی بنگال کے بعد تریپورہ میں بھی ترنمول کانگریس جیت حاصل کرے گی۔ ممتا بنرجی نے ریاستی سکریٹریٹ میں پریس کانفرنس سے خطاب کرتے ہوئے کہا کہ تریپورہ میں ترنمول کانگریس کو روکنے کے لئے بی جے پی غنڈہ گردی کا مظاہرہ کررہی ہے۔ انہوں نے کہا کہ تریپورہ میں امن و امان نام کی کوئی چیز نہیں ہے۔ ترنمول کانگریس کو تریپورہ میں کوئی روک نہیں سکتا ہے۔

قابل ذکر ہے کہ تریپورہ میں ترنمول کانگریس اور بی جے پی کے درمیان ٹکراؤ میں اضافہ ہوا ہے۔ اگرتلہ کے جن ہوٹلوں میں ترنمول کانگریس کے لیڈران قیام کر رہے ہیں وہاں بھی مسائل پیدا ہو رہے ہیں۔ ترنمول کانگریس نے الزام عاید کیا ہے کہ انتظامیہ ہوٹل پر دباؤ ڈال رہی ہے کہ ترنمو ل کانگریس کے لیڈروں کو کمرہ فراہم نہ کریں۔ ہوٹل کی بجلی منقطع کرنے کا بھی الزام عاید کیا ہے۔ ترنمول کانگریس نے دعویٰ کیا ہے کہ پارٹی لیڈروں کے کھانے کی فراہمی تک میں رخنہ ڈالا جا رہا ہے۔

وزیر اعلیٰ ممتا بنرجی نے کہا کہ تریپورہ میں ہوٹل میں قیام کرنا بھی مشکل ہو گیا ہے۔ یہ ایک مبالغہ نہیں ہے۔ جمہوریت کا مذاق ہے۔ دوسروں کو جمہوریت کاسبق دینے والے آج خود جمہوریت کا مذاق اڑانے لگے ہیں۔ ممتا بنرجی نے مزید کہا کہ ہمیں کوئی روک نہیں سکتا ہے۔ اس بار ہم تریپورہ میں جیتیں گے۔ ہم چاہتے ہیں کہ بنگال کے منصوبے تریپورہ میں بھی شروع کئے جائیں۔ تریپورہ میں بھی لوگوں کو مفت طبی علاج اور مفت چاول ملے۔ ہم چاہتے ہیں کہ تریپورہ کے لوگوں کو بھی فلاحی اسکیموں کا فائدہ ملنا چاہیے۔ وزیراعلیٰ نے اپنی بات کو آگے بڑھاتے ہوئے کہا کہ تریپورہ کے کئی سیاسی لیڈران ترنمول کانگریس میں شامل ہونا چاہتے ہیں۔

خیال رہے کہ بنگال اسمبلی انتخابات میں شاندار کامیابی کے بعد ترنمول کانگریس نے تریپورہ میں جیت حاصل کرنے کے لئے پوری طاقت جھونک دی ہے۔ ممتا بنرجی کے بھتیجے ابھیشیک بنرجی تریپورہ کا دورہ کر رہے ہیں اور ورکروں سے ملاقات کررہے ہیں۔