ٹوکیو پیرالمپک: تین ریاستی کھلاڑیوں کے میڈل جیتنے پر راجستھان میں منایا جا رہا جشن

اونی لکھیڑا، دیویندر جھاجھڑیا اور سندر سنگھ گجر کے تمغہ جیتنے پر راجستھان کے گورنر کلراج مشرا، وزیر اعلیٰ اشوک گہلوت اور سابق وزیر اعلیٰ وسندھرا راجے سمیت کئی سیاسی ہستیوں نے دلی مبارکباد پیش کی۔

اَونی لکھیڑا، تصویر آئی اے این ایس
اَونی لکھیڑا، تصویر آئی اے این ایس
user

یو این آئی

جے پور: ٹوکیوپیرالمپک میں راجستھان کی اونی لیکھرا نے شوٹنگ میں طلائی تمغہ اور ریاست کے ہی دیویندر جھاجھڑیا کے جیولین تھرو میں چاندی کا تمغہ اور سندر سنگھ گجر کے کانسے کا تمغہ جیتنے پر ریاست میں خوشی کی لہردوڑ گئی ہے۔

تینوں کھلاڑیوں کے تمغہ جیتنے پر جہاں گورنر کلراج مشرا، وزیر اعلیٰ اشوک گہلوت، سابق وزیر اعلیٰ وسندھرا راجے، بھارتیہ جنتا پارٹی (بی جے پی) کے ریاستی صدر ڈاکٹر ستیش پونیا اور کانگریس کے ریاستی صدر گووند سنگھ ڈوٹاسرا سمیت متعدد لیڈران اوردیگرلوگوں نے دلی مبارک باد اورنیک خواہشات دیں وہیں اونی لیکھرا کے جے پور میں شاستری نگرواقع ان کے گھرپر اہل خانہ اور ملنے والے لوگوں نے رقص وگانوں کے ساتھ جیت کاجشن منایا اور مٹھائیاں تقسیم کیں۔


اسی طرح مسٹر جھاجھڑیا کے ضلع چورو کے سادلپور گاؤں میں ان کی جیت پر خوشی کا ماحول ہے اور گاؤں کے لوگ ان کے اہل خانہ کے ساتھ آتش بازی کرکے جشن منایااور مٹھائیاں تقسیم کرکے خوشی منائی۔ اس موقع پر خواتین نے منگل گیت گا کر خوشی کااظہارکیا۔

کانسہ کا تمغہ جیتنے والے سندر سنگھ گجر کے ضلع کرولی میں واقع دیولن گاؤں میں بھی جشن اور خوشی کا ماحول ہے۔ ان کے گاؤں میں لوگ صبح سے ہی ٹی وی کے سامنے بیٹھ گئے اور ٹی وی پر سندر گجر کی کارکردگی کو دیکھنے کے ساتھ ہی گاوں والے اور اہل کانہ پیرالمپک میں کامیابی کے لئے بھجن، پوجا پاٹھ کیرتن کرتے رہے۔ جب سندر نے تمغہ جیت لیا تو تمام لوگ خوشی سے ناچ اٹھے اورمٹھائیاں تقسیم کرکے خوشی کااظہارکیا اور جیت کا جشن منایا۔ ریاست میں لوگ ان کی کامیابی پر ایک دوسرے کو مبارک باددے رہے ہیں۔ تینوں فاتحین کے گھر پر مبارک باددینے والوں کی لائن لگ گئی۔

ان تینوں کھلاڑیوں کی جیت سے پرجوش راجستھان حکومت نے اونی لیکھرا کو تین کروڑ، دیویندر جھاجھڑیا کو دو اور سندر سنگھ کو ایک کروڑ روپے انعام کا اعلان کیا ہے۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔