’جنھوں نے دیا ہے بار بار دھوکہ، انھیں بہار اب نہیں دے گا موقع‘، نتیش حکومت پر کانگریس حملہ آور

بہار میں اسمبلی انتخاب کی تاریخ جیسے جیسے قریب آ رہی ہے، سیاسی حملے بھی بڑھتے جا رہے ہیں۔ مہاگٹھ بندھن خاص طور سے ریاست کی نتیش حکومت کو مستقل نشانہ بنا رہی ہے، جس میں جرائم، بے روزگاری اور ہجرت جیسے مسائل ترجیحی بنیاد پر اٹھائے جا رہے ہیں۔ کانگریس بھی بہار کی این ڈی اے حکومت، یعنی جنتا دل یو کے ساتھ ساتھ بی جے پی کو بھی ہدف بنا رہی ہے۔ پارٹی لگاتار ’ووٹ چور، گدی چھوڑ‘ کا نعرہ بلند کر رہی ہے اور نتیش حکومت کی ناکامیوں بھی شمار کرا رہی ہے۔ یعنی وزیر اعلیٰ نتیش کمار کے ساتھ ساتھ وزیر اعظم نریندر مودی کو بھی کٹہرے میں کھڑا کیا جا رہا ہے۔

آج بہار میں ایک پریس کانفرنس سے خطاب کرتے ہوئے کانگریس ترجمان اتل لونڈھے پاٹل نے صاف لفظوں میں کہا کہ ’’جنھوں نے دیا ہے بار بار دھوکہ، انھیں بہار اب نہیں دے گا موقع۔‘‘ انھوں نے میڈیا اہلکاروں سے کہا کہ ’’این ڈی اے بہار میں کئی وعدے کر رہی ہے، لیکن آج میں ان سے کچھ سوال پوچھنا چاہتا ہوں۔ بی جے پی نے دہلی میں خواتین کو 2500 روپے دینے کا جو وعدہ کیا تھا، وہ وعدہ پورا کیوں نہیں ہوا؟ بی جے پی نے دہلی میں غریبوں کے گھروں کو کیوں توڑا؟ بی جے پی نے ہریانہ میں کسانوں کو دھان کی زیادہ قیمت دینے کا وعدہ کیا تھا، پھر کسانوں کو دھوکہ کیوں دیا؟ بی جے پی نے مہاراشٹر میں خواتین کو 2100 روپے دینے کا وعدہ کیا تھا، لیکن پھر ان کے ساتھ فریب کیوں کیا؟‘‘

قومی ترجمان اتل لونڈھے پاٹل نے پریس کانفرنس میں بی جے پی کو ہدف تنقید بناتے ہوئے کہا کہ ’’بی جے پی نے گزشتہ 11 سالوں میں ملک کی عوام کے ساتھ دھوکہ کیا ہے۔ چینی مل، مکھانہ کا نام تو لیتے ہیں، لیکن حقیقت سب کے سامنے ہے۔ سچ تو یہی ہے کہ– ایسا کوئی سگا نہیں، جسے بی جے پی نے ٹھگا نہیں۔‘‘ وہ مزید کہتے ہیں کہ ’’مہاراشٹر میں تینوں پارٹیوں میں رسہ کشی چل رہی ہے، جس کی وجہ سے وہاں سے بڑی بڑی صنعتیں شفٹ ہو رہی ہیں۔ روزگار ختم ہو رہا ہے۔‘‘

اتل لونڈھے نے بہار کی عوام سے اپیل کی کہ وہ بی جے پی سے خاص طور پر محتاط رہیں، کیونکہ یہ غریب مخالف پارٹی ہے۔ انھوں نے کہا کہ ’’میں بہاری باشندوں کو الرٹ کرتے ہوئے کہنا چاہتا ہوں کہ بی جے پی خواب تو بڑے بڑے دکھاتی ہے، لیکن کرتی کچھ نہیں۔ دربھنگہ میں ایمس کی مثال سب کے سامنے ہے۔‘‘

کانگریس کے سینئر لیڈر ابھے دوبے نے بھی ایک پریس کانفرنس میں عوام سے اپیل کی کہ وہ بہار کے اقتدار پر بیٹھے نااہل لوگوں کو سبق سکھائے۔ انھوں نے کہا کہ ’’بہار میں آر ٹی آئی سے جانکاری مانگنے پر لوگوں کو موت ملتی ہے۔ یکے بعد دیگرے قتل نے پورے بہار کو خون آلود کر دیا ہے۔ قتل کی فہرست طویل ہے اور سبھی مہلوکین ایک شفاف حکومت چاہتے تھے۔‘‘ وہ مزید کہتے ہیں کہ ’’ہم بہار کے لوگوں سے کہنا چاہتے ہیں کہ جو آپ کے حق اور حقوق کی حفاظت نہیں کر سکتا، اسے اقتدار میں نہیں رہنا چاہیے۔ ایسی تاناشاہ حکومت کو بدلنے کا وقت آ گیا ہے۔‘‘