مودی حکومت کے خلاف کانگریس نے جاری کیا بلیک پیپر، بے روزگاری سمیت کئی مسائل اٹھائے

نئی دہلی: انڈین نیشنل کانگریس نے جمعرات کو مودی حکومت کے خلاف 'بلیک پیپر' جاری کرتے بے روزگاری سمیت کئی اہم مسائل اٹھائے۔ پارٹی نے اس پیپر کو '10 سال، انیائے کال' یعنی ناانصافی کے دس سال کے نام سے جاری کیا ہے۔ اس موقع پر پریس سے بات کرتے ہوئے کانگریس صدر ملکارجن کھڑگے نے کہا کہ مودی حکومت بے روزگاری کے مسئلہ پر نہیں بولتی، وزیر اعظم مودی صرف آزادی سے پہلے کی باتیں کرتے ہیں۔ انہوں نے بی جے پی پر کانگریس کی منتخب حکومتوں کو گرانے کا بھی الزام عائد کیا۔

انہوں نے کہا، ’’جب بھی وہ (پی ایم مودی) پارلیمنٹ میں اپنے خیالات پیش کرتے ہیں تو بار بار اپنی کامیابیوں کی بات کرتے ہیں اور اپنی ناکامیوں کو چھپاتے ہیں۔ اور جب ہم ان کی ناکامیوں کی بات کرتے ہیں تو ہمیں اہمیت نہیں دی جاتی۔ اس لیے ہم نے سوچا کہ ان کی حکومت کے خلاف ’بلیک پیپر‘ جاری کیا جائے اور عوام کو اس سے آگاہ کیا جائے۔‘‘

کانگریس صدر نے کہا کہ ملک میں سب سے بڑا مسئلہ بے روزگاری ہے لیکن مودی حکومت اس پر کبھی بات نہیں کرتی ہے۔ وہ ہمیشہ 10 سال کا موازنہ کرتے ہیں لیکن پنڈت جواہر لال نہرو کی کامیابیوں کے بارے میں کبھی نہیں بتاتے۔ انہوں نے کہا کہ ایسی ریاست میں جہاں بی جے پی کی حکومت نہیں ہے، مرکزی حکومت منریگا کے پیسے بھی نہیں دیتی ہے، اور پھر بعد میں کہتی ہے کہ پیسہ جاری ہوا لیکن خرچ نہیں ہوا۔

ملکارجن کھڑگے نے کہا کہ ہم بے روزگاری کے مسئلے کو ایک بڑے مسئلے کے طور پر اٹھا رہے ہیں۔ بی جے پی اس پر کبھی بات نہیں کرتی ہے۔ انہوں نے کہا کہ کیرالہ، کرناٹک، تلنگانہ جیسی غیر بی جے پی ریاستوں کے ساتھ امتیازی سلوک کیا جا رہا ہے۔ کھڑگے نے کہا کہ ملک میں جمہوریت خطرے میں ہے۔ پچھلے 10 سالوں میں بی جے پی نے 411 ارکان اسمبلی کو اپنے پالے میں کر لیا۔ انہوں نے کانگریس کی کئی حکومتیں گرا دیں، بی جے پی جمہوریت کو تباہ کر رہی ہے۔

ملکارجن کھڑگے نے کہا کہ ملک میں جمہوریت خطرے میں ہے۔ انہوں نے کہا کہ کہ بی جے پی انتخابی بانڈز کے ذریعے ڈرا دھمکا کر رقم حاصل کر رہی ہے۔ ای ڈی، سی بی آئی اور مرکزی ایجنسیوں کے ذریعے لوگوں کو ڈرا کر پیسہ لیا جا رہا ہے۔ انہوں نے کہا کہ الیکٹورل بانڈز کے ذریعے حاصل ہونے والی رقم کے استعمال سے جمہوریت کو تباہ کیا جا رہا ہے۔ کھڑگے نے کہا کہ ہم بی جے پی کے خوف سے کمزور نہیں ہونے والے ہیں۔