تلنگانہ: عید سادگی کے ساتھ منائیں، جمعیۃ علماء ہند کی اپیل

جمعیۃ علماء ضلع وقارآباد نے عوام سے اپیل کی ہے کہ عید الفطر سادگی سے منائیں لیکن سادگی کا مطلب یہ نہیں ہے کہ اپنے پاس موجود نئے یا عمدہ کپڑے بھی نہ پہنیں بلکہ روایتی شاپنگ اور ٹھاٹ باٹ سے احتراز کریں

تصویر سوشل میڈیا
تصویر سوشل میڈیا
user

یو این آئی

حیدرآباد: جمعیۃ علماء ضلع وقارآباد (تلنگانہ) کے اراکین عاملہ کا اہم اجلاس زیر صدارت مولانا محمد عبداللہ اظہر قاسمی صدر جمعیۃ علماء ضلع وقارآباد منعقد ہوا، اس اجلاس میں لاک ڈاؤن کے دوران جمعیۃ کی جانب سے تاحال کی گئی تمام فلاحی ورفاہی خدمات کی تفصیلی رپورٹ پیش کی گئی۔

اس دوران کہا گیا کہ آج مغرب سے رمضان المبارک کا اخیر عشرہ شروع ہونے جا رہا ہے جس کی رمضان کے دیگر عشروں کے بالمقابل خصوصی فضیلت ہے۔ نبی کریم صلی اللہ علیہ وسلم رمضان کے آخری عشرہ میں خود بھی عبادت کے لئے کمر کس لیتے اور اہل خانہ کو بھی اس سے بھرپور استفادہ کی تلقین کرتے تھے اس لئے اس عشرہ میں خوب عبادات کا اہتمام کرنا چاہیے۔

اس عشرہ کی ایک اہم ترین عبادت ’اعتکاف‘ ہے جو کہ فرض کفایہ ہے اور لاک ڈاؤن کے دوران تمام مساجد میں بشمول امام ومؤذن چار تا پانچ افراد کی اجازت ہے لہذا ہر محلہ کی مسجد میں انہی متعینہ افراد میں سے کوئی سنت اعتکاف کی نیت سے مسجد میں بیٹھ جائے اس میں کوئی قانونی پیچیدگی ہے نہ سرکاری ہدایات کی خلاف ورزی۔

جمعیۃ علماء ضلع وقارآباد نے عوام سے اپیل کی ہے کہ عید الفطر سادگی سے منائیں لیکن سادگی کا مطلب یہ نہیں ہے کہ اپنے پاس موجود نئے یا عمدہ کپڑے بھی نہ پہنیں بلکہ تکلفات، روایتی شاپنگ اور ٹھاٹ باٹ سے حتی الامکان احتراز کریں اور ہر قسم کے غیر ضروری اخراجات سے بچتے ہوئے اپنے اڑوس پڑوس کے مستحقین کا خیال رکھیں۔

عیدالفطر کے لئے ابھی مکمل دس روز باقی ہیں لہذا نماز عیدالفطر کے متعلق کسی بھی قسم کی بے چینی یا الجھن میں پڑنے کی چنداں ضرورت نہیں ہے بلکہ ملکی حالات پر گہری نظر رکھنے والے اکابر مفتیان کرام کے موقف کا انتظار کریں۔ جمعیۃ علماء ضلع وقارآباد عیدالفطر کے موقع پر بڑے پیمانے پر مستحقین میں ’عید کٹس‘ کے تقسیم کا منصوبہ رکھتی ہے جن کی تقسیم کا بہت جلد آغاز عمل میں آئے گا۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔


next