تمل ناڈو اسمبلی نے پھر سے پاس کیا نِیٹ بل،بی جےپی کا بائیکاٹ
اسمبلی میں یہ پہلی بار ہوا ہے کہ گورنر کے بل کو واپس کرنے کے بعد سے دوبارہ پاس کیا گیا ہے اب اسے گورنر کے ذریعہ صدر کی منظوری کےلئے بھیجا جائےگا۔
تمل ناڈو اسمبلی کی تاریخ میں پہلی بار منگل کو ایک خصوصی اجلاس کا انعقاد کرکے قومی اہلیت اور داخلہ امتحان (نِیٹ)کے سلسلے میں پھر سے ایک بل پاس کیا گیا۔اس بل کے ذریعہ گریجویٹ میڈیکل داخلوں کےلئے ریاست کو نِیٹ امتحاس سے مستقل طورپر الگ رکھنے سے متعلق تجویز لائی گئی ہے۔
بھارتیہ جنتا پارٹی کے چارارکان اسمبلی کے بائیکاٹ کے درمیان وزیراعلی ایم کے اسٹالن نے بل کو پیش کیا جسے اتفاق رائے سے ایوان نے پاس کردیا۔
اسمبلی میں یہ پہلی بار ہوا ہے کہ گورنر کے بل کو واپس کرنے کے بعد سے دوبارہ پاس کیا گیا ہے۔ اب یہ بل دوبارہ دستخط کے لئے گورنر کے پاس جائے گا اور اب سب کی نگاہیں اس پر لگی ہوئی ہیں کہ گورنر کی جانب سے اگلا قدم کیا ہوتا ہے۔ گورنر اس بل پر دستخط کر دیں گے یا اس بل کے تعلق سے ان کا قدم کوئی اور ہوگا۔
نِیٹ بل کو پانچ مہینوں کے فرق سے دوبارہ لایا گیا ہے،جسے گورنر کے ذریعہ صدر کی منظوری کےلئے بھیجا جائےگا۔
گورنر آر این روی کے پرانے بل کو واپس کرنے کے بعد سبھی پارٹیوں کی میٹنگ میں اس خصوصی اسمبلی اجلاس کے انعقاد کا فیصلہ کیا گیا تھا۔ مسٹر اسٹالن کے ایوان میں تفصیل سے جواب دینے کے بعد بل بغیر مخالفت کے صوتی ووٹوں سے پاس ہوا۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔