جے پور میں تیز رفتار آڈی کار نے 16 لوگوں کو کچلا، ایک شخص کی موت

راجستھان کے جے پور میں جمعہ کی رات ایک تیز رفتار آڈی کار نے ایک کے بعد ایک 16 لوگوں کو ٹکرماردی۔ حادثے سے علاقے میں کہرام مچ گیا۔ اس حادثے میں ابھی تک ایک شخص کی موت کی تصدیق ہوئی ہے۔ یہ حادثہ جمعہ کی رات 9.30 بجے جے پور کی ’پترکار کالونی‘ میں کھراباس سرکل کے قریب پیش آیا۔ تیز رفتار آڈی کار پہلے ڈیوائیڈر سے ٹکرائی اور پھر بے قابو ہوکر سڑک کے کنارے کھڑے ٹھیلوں پر قہر بن کر ٹوٹ پری۔ کار تقریباً 30 میٹر تک ٹھیلوں اوراسٹالوں کو روندتی چلی گئی۔

یہ حادثہ دمن اور دیو کے رجسٹریشن نمبر والی آڈی کار سے پیش آیا۔ آڈی میں 3 افراد سوار تھے جن میں سے 2 کو پولیس نے حراست میں لے لیا ہے۔ تمام لوگ جے پور کے ہی رہنے والے ہیں۔ حادثے کے بعد جائے وقوعہ پر افراتفری مچ گئی۔ مقامی لوگوں کی مدد سے زخمیوں کو فوری طور پراسپتال منتقل کیا گیا۔

یہ ٹکر اس قدر شدید تھی کہ 12 سے زائد ٹھیلیاں اور اسٹال الٹ گئے اور سڑک کنارے کھڑی ایک کار بھی زوردار ٹکر سے اُلٹ گئی۔ اس ہولناک حادثے میں 16 افراد زخمی ہو گئے۔ واقعہ کی اطلاع ملتے ہی تھانہ موہانہ اور پترکار کالونی کی پولیس جائے وقوعہ پر پہنچ گئی۔ تمام زخمیوں کو ایمبولینس کے ذریعے فوری طور پرایس ایم ایس اور جے پوریہ اسپتال پہنچایا گیا جہاں ان کا علاج جاری ہے جب کہ 4 دیگر ابتدائی علاج کے بعد اپنے اہل خانہ کے ساتھ گھر لوٹ گئے۔

موہانا پولیس اسٹیشن کے ایس ایچ او گرو بھوپیندر سنگھ نے بتایا کہ ابتدائی تحقیقات سے پتہ چلتا ہے کہ آڈی کار بہت زیادہ تیز رفتار سے چل رہی تھی۔ ڈرائیور کے نشے میں ہونے کا شبہ ہے۔ پولیس نے حادثے کے بعد آڈی کار کو قبضے میں لے لیا ہے اور تفتیش جاری ہے۔ عینی شاہدین کے مطابق اگر لوگ بروقت نہ بھاگتے تو سانحہ مزید سنگین ہو سکتا تھا۔ تمام زخمیوں کو اسپتال میں داخل کرایا گیا ہے۔ 8 زخمیوں کا جے پوریہ اسپتال میں علاج چل رہا ہے، جب کہ 4 کا علاج نجی اسپتال میں علاج کیا جا رہا ہے۔ پولیس جائے وقوعہ کی جانچ کرکے حادثے کی وجہ جاننے میں مصروف ہے۔

اس سلسلے میں راجستھان کے وزیر اعلی بھجن لال شرما نے جے پور شہر اور اسپتال کے حکام کو ہدایات جاری کی ہیں۔ نائب وزیر اعلیٰ پریم چند بیروا بھی جائے وقوعہ پر پہنچے ۔ بیروا نے کہا کہ آ ڈی میں 3 افراد تھے جن میں سے 2 کو پولیس نے حراست میں لے لیا ہے۔ اس دوران آ ڈی کی زد میں آکر ایک شخص جاں بحق ہوگیا۔ زخمیوں کا علاج کیا جا رہا ہے۔ ملزمین قریبی جے پور کے رہنے والے ہیں۔