جموں سینٹرل جیل سے برآمد اسمارٹ فونز ڈی کوڈنگ کے لئے چندی گڑھ بھیج دیئے گئے

جموں: سینٹرل جیل کوٹ بلوال جموں میں چند روز قبل برآمد ہونے والے موبائل فون، جن کو مبینہ طور پر قیدی استعمال کرتے تھے، کو ڈی کوڈنگ کے لئے چندی گڑھ بھیج دیا گیا ہے۔ محکمہ جیل خانہ جات کے اندرونی ذرائع نے بتایا کہ جیل سے برآمد شدہ موبائل فونوں میں سے پانچ اسمارٹ فونوں کو ڈی کوڈنگ کے لئے فورنسک سائنس لیبارٹری چندی گڑھ بھیج دیئے گئے ہیں جبکہ بیس ماڈل فونز سائبر سیل جموں کو بھیج دیئے گئے ہیں۔

انہوں نے کہا کہ جیل سے سی آئی ڈی نے سات چاقو، دس موبائل فون (اینڈروئیڈ اور بیس ماڈل فون)، سات سم کارڈ، بارہ ہیڈ فون، چار پن ڈرائیو، یو ایس بی ملٹی پورٹ، ایک سیمسنگ موبائل فون بیٹری، پانچ چار جرز، دو بلیو ٹوتھ، تین ڈاٹا کیبلز برآمد کیے گئے ہیں۔ ان کا کہنا تھا کہ یہ چیزیں اس ہائی سیکورٹی جیل میں کیسے پہنچ گئیں، کے بارے میں تحقیقات کی جا رہی ہیں۔

مذکورہ ذرائع نے بتایا کہ موبائل فونز کو چندی گڑھ بھیج دیا گیا ہے اور ان سے ڈاٹا حاصل کرنے میں کچھ دن لگ سکتے ہیں۔ انہوں نے بتایا کہ ابتدائی تحقیقات سے معلوم ہوا ہے کہ جیل میں مقید ملی ٹنٹ بشمول غیر ملکی ملی ٹنٹ انہی اسمارٹ فونز کو استعمال کر کے سوشل میڈیا سائٹس چلا رہے تھے۔ ان کا کہنا تھا کہ یہ لوگ مختلف سوشل میڈیا سائٹس کے ذریعے اپنے پیغامات پاکستان بھیجا کرتے تھے۔