ووٹر ادھیکار یاترا میں خوب لگ رہے ’ووٹ چور، گدی چھوڑ‘ کے نعرے، راہل گاندھی نے لوگوں کی بھیڑ کو بتایا ’عوامی تحریک‘

بہار میں جاری ’ووٹر ادھیکار یاترا‘ میں لوگوں کی زبردست بھیڑ جمع ہو رہی ہے۔ راہل گاندھی کی قیادت میں آج یہ یاترا گواہاٹی میں سماں باندھتی ہوئی دکھائی دی۔ 17 اگست سے شروع ہوئی اس یاترا میں ہر روز لوگوں کی زبردست بھیڑ دکھائی دے رہی ہے۔ گزشتہ روز راہل گاندھی نے عوام کی زبردست بھیڑ دیکھ کر اپنے ایک بیان میں کہا تھا ’’یہ عوامی تحریک ہے، عوام بیدار ہو گئی ہے اور سمجھ چکی ہے کہ چوری سے بنی حکومت عوام کی نہیں ہوتی۔‘‘ آج گواہاٹی میں بھی عوام نے یاترا میں بڑی تعداد میں شریک ہو کر ثابت کر دیا کہ راہل گاندھی نے ’ووٹ چوری‘ کے خلاف جو تحریک شروع کی ہے، اس کی وہ مکمل حمایت کرتے ہیں۔

راہل گاندھی کے ساتھ بہار کے ایک ضلع سے دوسرے ضلع میں داخل ہو رہی اس یاترا میں کئی طرح کے نعرے لگ رہے ہیں، لیکن سب سے زیادہ ’ووٹ چوری، گدی چھوڑ‘ کا نعرہ بلند ہو رہا ہے۔ راہل گاندھی جگہ جگہ کی جا رہی اپنی مختصر تقریر میں وزیر اعظم نریندر مودی اور الیکشن کمیشن کو نشانہ بنانے سے پرہیز نہیں کر رہے۔

کانگریس اپنے سوشل میڈیا پلیٹ فارم پر راہل گاندھی کی اس یاترا کی ویڈیوز اور تصویریں بھی مستقل پوسٹ کر رہی ہے۔ ان پوسٹس میں بھی عوام کو بیدار کرنے والے جملے اور جوش بھر دینے والے نعرے لکھے دکھائی دے رہے ہیں۔ مثلاً آج کانگریس نے اپنی ایک پوسٹ میں لکھا کہ ’’یہ بہار کی زمین ہے، یہاں ووٹ چوروں کی سازش نہیں چلے گی۔‘‘ اس پوسٹ کے ساتھ جو ویڈیو شیئر کی گئی ہے، اس میں لوگوں کی زبردست بھیڑ راہل گاندھی کی گاڑی کے ساتھ ساتھ چلتی ہوئی دکھائی دے رہی ہے۔ ایک دیگر پوسٹ میں لوگوں کی بھیڑ کی طرف اشارہ کرتے ہوئے لکھا گیا ہے ’’یہ محبت اور حمایت بہار میں تبدیلی کی دستک ہے۔‘‘ ایک پوسٹ میں تو بے باک انداز میں لکھا گیا ہے ’’ووٹ چور یاد رکھیں، عوام انھیں سخت جواب دے گی۔‘‘

بہرحال، لوک سبھا میں حزب اختلاف کے قائد راہل گاندھی نے آج شام کٹیہار میں ایک جلسۂ عام سے خطاب کرتے ہوئے کہا کہ ’’ہماری ووٹر ادھیکار یاترا میں لاکھوں افراد شامل ہو رہے ہیں۔ بارش ہو یا دھوپ، دوپہر ہو یا رات... ہر ماحول میں لوگ ہمارے ساتھ آ رہے ہیں۔‘‘ وہ مزید کہتے ہیں کہ ’’آج کل ہر طرف ’ووٹ چور، گدی چھوڑ‘ کا نعرہ گونج رہا ہے۔ لیکن آپ ٹی وی کھولیں گے تو آپ کو کہیں بھی یہ نعرہ اور یاترا نہیں دکھائی دے گی، کیونکہ یہ میڈیا والے آپ کے ہیں ہی نہیں۔ یہ صرف ارب پتیوں کے ہیں۔‘‘

قابل ذکر ہے کہ گزشتہ روز راہل گاندھی نے یاترا میں جمع ہو رہی بھیڑ کو ’عوامی تحریک‘ قرار دیا تھا۔ انھوں نے سوشل میڈیا پر کی گئی اپنی پوسٹ میں لکھا تھا کہ ’’ووٹ چور حکومت دیکھ لو– یہ غصہ ہے بے روزگاری اور مہنگائی کے خلاف۔ یہ ناراضگی ہے 2 دہائی کی غریبی اور ہجرت کے خلاف، یہ انقلاب ہے ووٹ چوری کے خلاف‘‘۔ اس پوسٹ میں انھوں نے یہ بھی لکھا تھا کہ ’’یہ عوامی تحریک ہے۔ عوام بیدار ہو گئی ہے اور سمجھ چکی ہے کہ چوری سے بنی حکومت عوام کی نہیں ہوتی۔