مودی ملک کو گمراہ کرنے میں مصروف: کانگریس

کانگریس نے وزیر اعظم نریندر مودی پر غلط بیانی کرنے اور ملک کے عوام کو گمراہ کرنے کا الزام عائد کرتے ہوئے کہا کہ وزیر اعظم اپنے جلسوں میں لگاتار جھوٹ پر جھوٹ بول رہے ہیں۔ کانگریس کے سینئر رہنما آنند شرما نے کہا ’’وزیر اعظم نریندر مودی اپنی پارٹی کے حق میں اگلے چناؤ کی تشہیری مہم چلا رہے ہیں۔ یہ کوئی ترقیاتی مہم نہیں بلکہ یہ تشہیری مہم ہے۔ اس پر کسی کو کوئی اعتراض نہیں ہے لیکن مودی چناوی تشہیر کے بجائے پروپیگنڈہ چلا رہے ہیں۔ وہ کینہ سے بھرے ہوئے ہیں۔ کانگریس کے تئیں وہ شروع سے نازیبا زبان استعمال کرتے آئے ہیں۔‘‘

آنند شرما نے کہا ’’وزیر اعظم نریندر مودی کا جھوٹ بولنے اور لوگوں کو گمراہ کرنے کا کام جاری ہے۔ انہیں نہ تو زمین کی خبر ہے اور نہ ہی تاریخ کی۔ انہیں لگتا ہے کہ لوگوں کو کچھ پتہ ہی نہیں۔‘‘

کانگریس رہنما نے کہا ’’اپنے بیانوں سے وزیر اعظم مودی تاریخی واقعات کی بے عزتی کرتے ہیں۔ وہ ملک کی عظیم شخصیات اور ان کی کامیابیوں کو بھی مسترد کر دیتے ہیں۔ ملک کے وزیر اعظم نے بار بار ایسے بیانات دئیے ہیں جو تاریخی اعتبار سے صحیح نہیں ہیں۔ ایسے بیانوں سے ملک کو شرمندگی اٹھانی پڑتی ہے کیونکہ وزیر اعظم کا بیان ملک میں ہی نہیں بلکہ بیرون ملک میں بھی سنا جاتا ہے۔ لیکن وہ اپنی عادت سے مجبور ہیں۔ ان میں سدھار کی کوئی گنجائش باقی نہیں رہی۔

آنند شرما نے کہا کہ وزیر اعظم مودی کو جھوٹ بولنے اور لوگوں کو گمراہ کرنے کے بجائے اپنے 4 سالوں میں کیے کام کا حساب دینا چاہئے۔ انہوں نے کہا کہ وزیراعظم مدت کار کا حساب دینے کے بجائے ہر روز نئے نئے وعدے کر رہے ہیں۔ آنند شرما نے کہا کہ وزیراعظم کو یہ سوچنا چاہئے کہ وہ ملک کے وزیراعظم ہیں، صرف بی جے پی کے نہیں۔

آنند شرما نے کہا ’’وزیر اعظم کو اپنے جھوٹ کے لئے لوگوں سے معافی مانگنی چاہئے۔ ملک میں ہو رہے ظلم و ستم پر بات کرنی چاہئے۔ ماں بہنوں کے خلاف جاری تشدد پر بات کرنی چاہئے، لیکن وہ صرف لوگوں کو گمراہ کرنے کا کام کر رہے ہیں۔