شری امرناتھ یاترا: تقریباً 6 ہزار یاتری پوتر گپھا کی طرف روانہ

سری نگر: شری امرناتھ جی یاترا کا سلسلہ مذبی جوش و جذبے سے جاری رہتے ہوئے زائد از ساڑھے پانچ ہزار یاتریوں پر مشتمل قافلہ منگل کی صبح وسطی کشمیر کے ضلع گاندربل میں واقع پوتر گپھا کے درشن کے لئے پہلگام اور بالتل بیس کیمپوں سے روانہ ہوگیا۔

سرکاری ذرائع نے بتایا کہ خشک و سازگار موسمی حالات کے بیچ منگل کی صبح یاتریوں کے ایک اور قافلے کو دونوں بیس کیمپوں پہلگام اور بالتل سے پوتر گپھا کی طرف جانے کی اجازت دی گئی۔ انہوں نے کہا کہ 2 ہزار ایک سو 43 یاتریوں جن میں 682 خواتین، 40 سادھو اور 10 بچے شامل ہیں، بالتل بیس کیمپ سے پوتر گپھا کی طرف روانہ ہوگئے اور اس کے علاوہ بالتل سے557 یاتریوں کو چاپر کے ذریعے پوتر گپھا پہنچایا گیا۔

ان کا کہنا تھا کہ زائد از تین ہزار یاتری ننون پہلگام بیس کیمپ سے پوتر گپھا کی طرف روانہ ہوگئے۔ قابل ذکر ہے کہ 30 جون سے شروع ہونے والی اس یاترا کے دوران اب تک قریب تین لاکھ یاتریوں نے پوتر گپھا کے درشن کیے ہیں۔ اس یاترا کے دوران اب تک 51 افراد کی موت واقع ہوئی ہے جن میں آٹھ جولائی کو بالتل کے نزدیک بادل پھٹنے کے واقعے میں جان بحق ہونے والے 15 یاتری بھی شامل ہیں۔ 43 دنوں پر محیط یہ یاترا 11 اگست کو رکھشا بندھن کے تہوار کے موقعے پر اختتام پذیر ہوگی۔