آج پھر ہوئی شرد پوار اور پرشانت کشور کی ملاقات، 15 دنوں کے اندر تیسری میٹنگ
پرشانت کشور اور شرد پوار کے درمیان تازہ ملاقات کے بارے میں بتایا جا رہا ہے کہ انھوں نے بند کمرے میں تقریباً ایک گھنٹے تک بات چیت کی۔ اس میٹنگ سے سیاسی گلیاروں میں ہلچل دیکھنے کو مل رہی ہے۔
سیاسی میدان میں اپنی اسٹریٹجی کے لیے مشہور پرشانت کشور نے آج ایک بار پھر این سی پی سربراہ شرد پوار سے ملاقات کی۔ پندرہ دنوں کے اندر یہ دونوں کے درمیان تیسری ملاقات ہے جس کی وجہ سے سیاسی حلقوں میں ہلچل کافی بڑھ گئی ہے۔ یہاں قابل غور ہے کہ ایک دن قبل ہی آٹھ اپوزیشن پارٹیوں کے لیڈران شرد پوار کی رہائش گاہ پر جمع ہوئے تھے اور انھوں نے کئی اہم ایشوز پر تبادلہ خیال کیا تھا۔
پرشانت اور پوار کے درمیان تازہ ملاقات کے بارے میں بتایا جا رہا ہے کہ ان کی میٹنگ تقریباً ایک گھنٹے تک چلی۔ ذرائع کے مطابق پوار کے دہلی واقع رہائش پر پرشانت کشور نے ان سے بند کمرے میں ملاقات کی۔ مغربی بنگال اسمبلی انتخابات میں ترنمول کانگریس کی جیت میں اہم کردار نبھانے والے پرشانت نے 11 جون کو ممبئی میں پوار کی رہائش پر دوپہر کے کھانے پر ان سے ملاقات کی تھی، اور دوسری بار گزشتہ پیر کے روز ان دونوں کی میٹنگ ہوئی تھی۔
پوار کے ساتھ لگاتار ہو رہی پرشانت کشور کی میٹنگ نے بی جے پی کے خلاف تیسرا محاذ کھڑا کیے جانے کی قیاس آرائیوں کو ہوا دے دی ہے۔ پوار نے منگل کو دہلی میں اپنی رہائش پر آٹھ اپوزیشن پارٹیوں کے لیڈروں کے ساتھ میٹنگ کی تھی اور ان میں ترنمول کانگریس، سماجوادی پارٹی، عام آدمی پارٹی، راشٹریہ لوک دل اور بایاں محاذ پارٹی شامل تھیں۔ حالانکہ اس میٹنگ میں حصہ لینے والے لیڈروں نے کہا تھا کہ یہ سابق وزیر مالیات اور ترنمول کانگریس کے نائب صدر یشونت سنہا کے ذریعہ بنائے گئے ’راشٹریہ منچ‘ کی یکساں نظریات والے لوگوں کی ’غیر سیاسی‘ ملاقات تھی۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔