نتیش حکومت کے خلاف آر جے ڈی کے مظاہرہ میں ہنگامہ

بہار میں بڑھتے جرائم اور بے روزگاری کے ساتھ ساتھ دیگر عوامی مسائل کو لے کر آر جے ڈی نے سڑک پر اتر کر مظاہرہ کیا۔ پٹنہ میں آر جے ڈی نے نتیش حکومت کے خلاف مارچ نکالا جس میں ہنگامہ والے حالات پیدا ہو گئے۔ آر جے ڈی نے اپنا مارچ جے پی گولمبر سے شروع کیا اور اس دوران پولس نے آر جے ڈی کارکنان کو روکنے کی کوشش کی۔ پولس اور آر جے ڈی کارکنان میں دھکا-مکی والے حالات بھی پیدا ہو گئے۔ تیجسوی یادو اور تیج پرتاپ یادو کا کہنا ہے کہ پولس کے ذریعہ ان کا قتل کرنے کی کوشش کی جا رہی ہے۔ یہاں قابل ذکر ہے کہ آر جے ڈی نے بہار اسمبلی کا گھیراؤ کرنے کا ارادہ کیا ہوا ہے۔

اس سے قبل آر جے ڈی لیڈر تیجسوی یادو نے کہا کہ عظیم سماجوادی لیڈر رام منوہر لوہیا کا کہنا تھا کہ سڑک سونی ہو جائے تو ایوان آوارہ ہو جائے گا۔ پٹنہ میں تیجسوی نے منگل کے روز نامہ نگاروں سے بات چیت کرتے ہوئے کہا کہ ’’آج مہاگٹھ بندھن میں شامل پارٹیاں اسمبلی گھیرنے کے لیے سڑک پر اتریں گی۔ بہار حکومت مفاد عامہ میں کام نہیں کر رہی ہے، اس لیے اسے آئینہ دکھانا ضروری ہے۔‘‘ انھوں نے مزید کہا کہ ان کی پارٹی اپوزیشن کا کردار نبھا رہی ہے اور حکومت سے مفاد عامہ کے ایشوز پر سوال کر رہی ہے۔

اس درمیان آر جے ڈی لیڈر اور سابق وزیر صحت تیج پرتاپ یادو نے اپنے ٹوئٹر ہینڈل سے ٹوئٹ کرتے ہوئے لکھا کہ ’’کان کھول کر سن لو، روک سکو تو روک لو۔ ہم نے اب یہ ٹھانا ہے، بے روزگار نوجوانوں کی چولہے سے لپٹی خواتین کو ان کا حق دلوانا ہے۔‘‘

غور طلب ہے کہ آر جے ڈی کے سینکڑوں کارکنان اور لیڈر پٹنہ کے گاندھی میدان واقع جے پی گولمبر پر جٹے ہوئے ہیں۔ انھیں وہیں روکنے کے لیے کثیر تعداد میں پولس کی تعیناتی کی گئی ہے۔ آر جے ڈی کارکنان نعرہ بازی کر رہے ہیں۔