رشی کمار شکلا سی بی آئی کے نئے سربراہ مقرر

انڈین پولس سروسز کے سینئر افسر رشی کمار شکلا کو سی بی آئی کا نیا ڈائریکٹر مقرر کیا گیا ہے۔ رشی کمار شکلا مدھیہ پردیش کے 1983 کیڈر کے آفیسر ہیں۔ ان کی تقرری دو سالوں کے لئے ہوئی ہے۔ رشی کمار شکلا مدھیہ پردیش کے ڈی جی پی (ڈائریکٹر جنرل آف پولس) رہ چکے ہیں۔

محکمہ برائے کارکن اور تربیت کے مطابق کابینہ کی اپائنٹمنٹ کمیٹی نے ان کی تقرری کو ہری جھنڈی دی ہے۔ جمعہ کو ہی اس حوالے سے میٹنگ ہوئی تھی جو دو گھنٹوں تک چلی تھی۔ میٹنگ کے دوران کئی ناموں پر غور و خوض کیا گیا لیکن آخر میں رشی کمار کے نام پر عام رائے بنی۔

واضح رہے کہ گزشتہ کافی وقت تک سی بی آئی میں گھمسان جاری رہا تھا جس کے بعد مرکزی حکومت نے سی بی آئی کے سربراہ آلوک ورما کو جبراً چھٹی پر بھیج دیا تھا۔ آلوک ورما پر انہیں کے نائب افسر راکیش استھانہ نے بدعنوانی کے الزامات عائد کیے تھے۔ مرکزی حکومت کے اس قدم کے خلاف آلوک ورما سپریم کورٹ سے رجوع ہوئے جہاں سے فیصلہ ان کے حق میں آیا لیکن اس کے بعد مودی حکومت نے اعلیٰ اختیارات حاصل کمیٹی کا سہارا لے کر انہیں عہدے سے برطرف کر دیا۔ حکومت نے آلوک ورما کا تبادلہ دوسرے محکمہ میں کرنا چاہا لیکن آلوک ورما نے وہ عہدہ سنبھالنے سے انکار کرتے ہوئے اپنا استعفیٰ دے دیا تھا۔ آلوک ورما 39 سال کے بعد 31 جنوری 2019 کو ریٹائر ہونے والے تھے۔

سابق سی بی آئی افسر آلوک ورما کو ڈائریکٹر کے عہدے سے ہٹانے کے لئے اعلی اختیار حاصل کمیٹی نے 2-1 سے فیصلہ لیا تھا۔ اس میٹنگ میں وزیر اعظم نریندر مودی، جسٹس اے کے سیکری اور لوک سبھا میں حزب اختلاف کے قائد ملکارجن کھڑگے شامل ہوئے تھے۔ حالانکہ کھڑگے نے اس فیصلہ کی مخالفت کی تھی۔ کھڑگے کا کہنا تھا کہ آلوک ورما پر جو الزامات عائد کیے گئے ان کے حوالے سے میٹنگ میں تمام ثبوتوں کو پیش ہی نہیں کیا گیا اور منمانہ طریقہ سے فیصلہ لے لیا گیا۔