بھگت سنگھ پر ڈرامہ کا چل رہا تھا ریہرسل، ٹیبل کھسکا اور بچے کو لگ گئی پھانسی!

اتر پردیش کے بدایوں ضلع میں ایک افسوسناک حادثہ پیش آیا جس میں دس سالہ بچے کی پھانسی لگنے سے موت واقع ہو گئی۔ دراصل بدایوں کے تھانہ سول لائن علاقہ واقع ایک گاؤں میں 15 اگست کو بھگت سنگھ پر ڈرامہ پیش کرنے کے لیے ریہرسل کر رہے بچے کے پیر کے نیچے موجود ٹیبل اچانک کھسک گیا جس سے بچے کے گلے میں پھندا کس گیا اور پھر موقع پر ہی اس کی موت واقع ہو گئی۔ خبروں کے مطابق اس واقعہ کے بعد بچے کے اہل خانہ نے بغیر پولیس کارروائی کے ہی اس کی آخری رسومات ادا کر دی۔

میڈیا ذرائع سے موصول ہو رہی خبروں کے مطابق تھانہ کنور گاؤں علاقہ کے گرام بابٹ باشندہ بھورے سنگھ کا 10 سالہ بیٹا شیوم جمعرات کو گھر میں تنہا تھا جس کے بعد محلے کے دیگر بچے بھی آ گئے اور یومِ آزادی پر ڈرامہ کے لیے سردار بھگت سنگھ پر مبنی ڈرامہ کی تیاری کرنے لگے۔ شیوم سردار بھگت سنگھ کا کردار نبھا رہا تھا۔ اس دوران پھندا لگنے سے اس کی جان چلی گئی۔ جس وقت یہ حادثہ ہوا بچے کی ماں آرتی اور والد بھورے سنگھ کھیت میں کام کرنے گئے تھے۔ شیوم کے گلے میں پھندا لگنے کے بعد وہاں موجود بچے پریشان ہوئے اور مدد کے لیے آس پاس کے لوگوں کو پکارنے لگے۔ جب پڑوسی وہاں پہنچے تو لڑکے کو مردہ پایا۔ کسی طرح بچے کو پھندے سے اتارا گیا اور انتہائی غمناک ماحول میں اہل خانہ نے بچے کی آخری رسومات ادا کر دی۔

گرام پردھان بھیم سین ساگر کا کہنا ہے کہ بچے کھیل رہے تھے اور والدین گھر پر موجود نہیں تھے جب یہ حادثہ پیش آیا۔ بدایوں کے سینئر پولیس سپرنٹنڈنٹ سنکلپ شرما نے بتایا کہ ان کی جانکاری میں یہ معاملہ آیا تھا۔ انھوں نے بتایا کہ تھانہ کنور گاؤں کے تھانہ انچارج کی قیادت میں پولیس کی ایک ٹیم جائے حادثہ پر بھیجی گئی تھی لیکن اہل خانہ نے یہ تو بتایا کہ بچے کی موت ہو گئی، لیکن کس طرح سے ہوئی یہ جانکاری نہیں دی۔ سنکلپ شرما کا کہنا ہے کہ لوگوں کے مطابق بھگت سنگھ پر ڈرامہ کی تیاری کرتے وقت بچہ ٹیبل سے گر گیا اور پھانسی لگنے سے اس کی موت ہو گئی۔ انھوں نے کہا کہ پولیس ٹیم پورے معاملے کی جانچ کر رہی ہے اور جو بھی باتیں سامنے آئیں گی اس کی بنیاد پر آگے کی کارروائی کی جائے گی۔