راجستھان کے نتائج حیرت انگیز، کانگریس کی شکست کے اسباب پر غور کیا جائے گا: اشوک گہلوت

راجستھان کے وزیر اعلیٰ اشوک گہلوت نے اتوار کو ریاستی اسمبلی انتخاب میں شکست کو قبول کرتے ہوئے کہا کہ نتائج حیرت انگیز ہیں اور پارٹی ان اسباب کی جانچ کرے گی جن کی وجہ سے شکست ہوئی ہے۔ گہلوت  نے میڈیا سے بات کرتے ہوئے کہا کہ "میں کہتا رہا ہوں کہ عوام سب سے اہم ہیں۔ اسمبلی انتخاب کا نتیجہ حیرت انگیز ہے۔ کانگریس امید کر رہی تھی کہ عوام کا مینڈیٹ اس کے حق میں ہوگا۔ لیکن ہم ریزلٹ کو عاجزی کے ساتھ قبول کرتے ہیں۔ ہم نئی حکومت کو مبارکباد پیش کرتے ہیں اور امید کرتے ہیں کہ وہ لوگوں کے لیے کام کرے گی۔"

جب گہلوت سے سوال کیا گیا کہ کیا پارٹی ریاستی حکومت کے منصوبوں کو لوگوں تک نہیں لے جا پا رہی ہے، تو گہلوت نے کہا کہ "مجھے لگتا ہے راجستھان حکومت کے منصوبے اچھے تھے اور پورے ملک میں ان کا تذکرہ ہوا اور گارنٹی بھی اچھی تھی، لیکن چھتیس گڑھ میں اور مدھیہ پردیش میں بھی نتائج ہمارے موافق نہیں رہے، یہ حیرت انگیز تھے۔" انھوں نے مزید کہا کہ "ہم ان اسباب کا پتہ لگائیں گے جن کی وجہ سے ان تین ریاستوں میں پارٹی کی شکست ہوئی۔"