راہل-پرینکا نے لکھیم پور کھیری پہنچ کر متاثرہ کنبے کو گلے لگایا، ہر ممکن مدد کا دلایا بھروسہ

راہل اور پرینکا نے مہلوک کسان کے گھر والوں سے مل کر ان کی ہمت بڑھائی اور انھیں ہر ممکن مدد کا بھروسہ دلایا، راہل گاندھی نے کہا کہ اس مشکل وقت میں پوری کانگریس پارٹی ان کے ساتھ ہے۔

تصویر سوشل میڈیا
تصویر سوشل میڈیا
user

تنویر

لکھیم پور کھیری میں بی جے پی حکومت کے خلاف موجود غم و غصے کے درمیان تشدد میں ہلاک کسانوں کے کنبے سے کانگریس کے سابق صدر راہل گاندھی اور جنرل سکریٹری پرینکا گاندھی نے ملاقات کی۔ کافی جدوجہد کے بعد راہل اور پرینکا کو لکھیم پور کھیری جانے کی اجازت ملی تھی، اور پھر سخت سیکورٹی کے درمیان راہل و پرینکا نے سب سے پہلے پلیا کلاں پہنچے۔ یہاں انھوں نے مہلوک کسانوں لوپریت سنگھ اور نچھتر سنگھ کے گھر والوں سے ملاقات کی اور انھیں گلے لگایا۔

راہل اور پرینکا نے مہلوک کسان کے گھر والوں سے مل کر ان کی ہمت بڑھائی اور انھیں ہر ممکن مدد کا بھروسہ دلایا۔ راہل گاندھی نے کہا کہ اس مشکل وقت میں پوری کانگریس پارٹی ان کے ساتھ ہے اور انصاف کی لڑائی سب مل کر لڑیں گے۔ اتر پردیش کی انچارج پرینکا گاندھی نے مہلوکین کے رشتہ داروں کو بھروسہ دلایا کہ کانگریس کا ہر کارکن ان کی مدد کے لیے تیار ہے اور ناانصافی کے خلاف آواز کو دبنے نہیں دیا جائے گا۔


راہل گاندھی اور پرینکا گاندھی کے ساتھ پنجاب کے وزیر اعلیٰ چرنجیت سنگھ چنّی اور چھتیس گڑھ کے وزیر اعلیٰ بھوپیش بگھیل بھی تھے۔ ان دونوں لیڈروں نے بھی متاثرہ کنبہ کو ہمت سے کام لینے کی تلقین کی اور انصاف کی لڑائی میں ہر طرح سے تعاون کا عزم ظاہر کیا۔

قابل ذکر ہے کہ کافی ہنگامہ اور احتجاج کے بعد راہل گاندھی کو یو پی انتظامیہ نے لکھیم پور کھیری جانے کی اجازت دی۔ سیتاپور سے راہل اپنی بہن پرینکا کے ساتھ ایک گاڑی میں، جب کہ کانگریس جنرل سکریٹری کے سی وینوگوپال اور رندیپ سرجے والا دوسری گاڑی میں روانہ ہوئے۔ قافلے میں شامل تیسری گاڑی میں پنجاب کے وزیر اعلیٰ چرنجیت سگھ چنّی اور چھتیس گڑھ کے وزیر اعلیٰ بھوپیش بگھیل بیٹھے ہوئے تھے۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔