کانگریس ورکنگ کمیٹی سے متعلق میڈیا کسی قیاس آرائی سے پرہیز کرے: کانگریس

کانگریس ترجمان رندیپ سنگھ سرجے والا نے میڈیا میں چل رہی ان خبروں کو غلط بتایا ہے جس میں یہ کہا جا رہا ہے کہ کانگریس صدر راہل گاندھی اب بھی استعفیٰ پر بضد ہیں۔ سرجے والا نے ایک بیان جاری کر کہا کہ کانگریس نے راہل گاندھی کو پارٹی کے اندر بدلاؤ کرنے کی ذمہ داری سونپی ہے۔ ساتھ ہی میڈیا سے گزارش کی گئی ہے کہ وہ تنظیم کی پاکیزگی کو برقرار رکھنے میں مدد کریں۔

سرجے والا نے کہا کہ کانگریس ورکنگ کمیٹی نظریات کے تبادلوں اور اصلاحی کارروائی کرنے کے لیے ایک جمہوری اسٹیج ہے، اس لیے میڈیا کو چاہیے کہ اس کا وقار برقرار رکھے۔ میڈیا کے ایک گروپ میں آنے والے اندازوں، قیاس آرائیوں، بیانات اور افواہوں کو برداشت نہیں کیا جائے گا۔ انھوں نے کہا کہ میٹنگ میں ہوئی ساری بات چیت اور سرگرمیاں رازداری طلب کرتی ہیں۔ میڈیا سے گزارش ہے کہ ورکنگ کمیٹی کی میٹنگ کے بارے میں جانکاریاں صرف قیاس آرائیوں کی بنیاد پر نہ جاری کریں۔

واضح رہے کہ لوک سبھا انتخاب کے نتائج کا تجزیہ کرنے کے لیے 25 مئی کو کانگریس ورکنگ کمیٹی کی میٹنگ ہوئی۔ میٹنگ میں کانگریس صدر راہل گاندھی نے بھی اپنے عہدہ سے استعفیٰ کی پیشکش کی۔ لیکن کانگریس کے سینئر لیڈروں نے ان کے فیصلے کو منظور نہیں کیا اور ان کو عہدہ پر بنے رہنے کے لیے کہا۔

کانگریس ورکنگ کمیٹی کی میٹنگ کے بعد سے ہی میڈیا میں قیاس آرائیوں کا دور شروع ہو گیا ہے۔ انہی قیاس آرائیوں کی وجہ سے پارٹی ترجمان سرجے والا نے کہا کہ ہم میڈیا سمیت سبھی سے گزارش کریں گے کہ وہ امکانات اور قیاس آرائیوں کے جال میں نہ پھنسیں۔ انھوں نے کہا کہ ورکنگ کمیٹی کی میٹنگ میں ہوئے صلاح و مشوروں کا اختصار عوام کے لیے جاری کیا گیا تھا۔ ایسے میں میڈیا کوئی الگ اندازہ نہ لگائے اور نہ ہی قیاس آرائی کرے۔