منریگا ورکرز کنونشن سے راہل گاندھی کا خطاب، ’مودی کو پیچھے ہٹانے کے لیے غریبوں کا ایک ہونا ضروری‘، دیکھیں ویڈیو

نئی دہلی کے جواہر بھون میں منعقدہ ’نیشنل منریگا ورکرز کنونشن‘ سے خطاب کرتے ہوئے لوک سبھا میں قائد حزب اختلاف اور کانگریس کے سینئر لیڈر راہل گاندھی نے الزام عائد کیا کہ نریندر مودی حکومت مہاتما گاندھی قومی دیہی روزگار ضمانتی قانون یعنی منریگا کے بنیادی تصور کو ختم کرنا چاہتی ہے۔ انہوں نے کہا کہ منریگا کا مقصد غریب شہریوں کو باعزت روزگار کا حق دینا تھا، تاکہ جسے بھی کام کی ضرورت ہو وہ مطالبہ کر کے احترام کے ساتھ کام حاصل کر سکے۔ یہ منصوبہ پنچایتی راج کے نظام کے ذریعے چلایا جا رہا تھا، جس میں مزدوروں کی آواز، عزت اور حق کو مرکزی حیثیت حاصل تھی۔

راہل گاندھی نے کہا کہ اس قانون نے ہر غریب شخص کو روزگار کا حق دیا لیکن اب اس تصور کو جان بوجھ کر کمزور کیا جا رہا ہے۔ ان کے مطابق حکومت کی کوشش ہے کہ منریگا کو مرکزیت کی طرف لے جایا جائے، جہاں یہ فیصلہ دہلی میں بیٹھ کر ہو کہ کس ریاست یا ضلع کو کتنا فنڈ ملے گا۔ انہوں نے الزام لگایا کہ حکمراں جماعت کے زیر انتظام ریاستوں کو زیادہ اور اپوزیشن کی ریاستوں کو کم وسائل دیے جائیں گے، جبکہ مزدوروں کے حقوق ختم کر کے فائدہ ٹھیکیداروں اور بیوروکریسی کو پہنچایا جائے گا۔

انہوں نے ماضی کی مثال دیتے ہوئے کہا کہ جس طرح کسانوں کے خلاف قوانین لائے گئے تھے اور عوامی دباؤ کے نتیجے میں انہیں واپس لینا پڑا، اب ویسی ہی کوشش مزدوروں کے ساتھ کی جا رہی ہے۔ راہل گاندھی کے مطابق یہ سب ایک بڑی سوچ کا حصہ ہے، جس کے تحت ملک کی دولت اور اثاثے چند منتخب ہاتھوں میں سونپ دیے جائیں اور غریب، بالخصوص دلت، آدیواسی اور او بی سی طبقات، بڑے سرمایہ داروں پر مکمل طور پر منحصر ہو جائیں۔

راہل گاندھی نے کہا کہ نوٹ بندی، غلط جی ایس ٹی اور دیگر فیصلے بھی آئین پر حملے کی مثالیں ہیں۔ ان کا کہنا تھا کہ مقصد آئین، جمہوریت اور ایک فرد ایک ووٹ کے اصول کو کمزور کرنا ہے۔ انہوں نے کہا کہ ملک کو پھر سے اس دور میں لے جانے کی کوشش ہو رہی ہے جہاں چند افراد تمام فیصلے کرتے تھے۔

راہل گاندھی نے زور دیا کہ اس کا واحد جواب اتحاد ہے۔ انہوں نے کہا کہ اگر مزدور اور غریب طبقہ ایک ساتھ کھڑا ہو جائے تو حکومت کو پیچھے ہٹنا پڑے گا۔ انہوں نے یہ بھی واضح کیا کہ کانگریس پارٹی جہاں بھی مزدوروں کے ساتھ کھڑی ہو سکتی ہے، وہاں ان کے شانہ بشانہ موجود رہے گی۔ کنونشن کے دوران راہل گاندھی نے پارٹی صدر ملکارجن کھڑگے کے ہمراہ ملک بھر سے لائی گئی مٹی سے پودے لگا کر یکجہتی کا پیغام بھی دیا۔