مودی مجھ سے بحث کرنے سے پہلے اپنے ’کارناموں‘ کی کتاب کھول کر دیکھیں: راہل گاندھی

کانگریس کے صدر راہل گاندھی نے بدعنوانی کے مسئلہ پر وزیر اعظم مودی پر حملہ بولا ہے۔ انہوں نے ٹوئٹ کر کے کہا، ’’ڈیئر مودی، کیا آپ بدعنوانی کے مسئلہ پر مجھ سے بحث کرنے سے خوف کھا رہے ہیں؟ میں اسے (بحث کو) آپ کے لئے آسان بنا سکتا ہوں۔

جائیے آپ تیاری کے لئے ان کتابوں کو کھول لیجیے:

1. رافیل + انل امبانی

2. نیرو مودی

3. امت شاہ + نوٹ بندی

قبل ازیں راہل گاندھی نے بدعنوانی کے مسئلہ پر وزیر اعظم کو بحث کا چیلنج دیا ہوا ہے۔ انہوں نے کہا تھا کہ وزیر اعظم مودی کو بدعنوانی سمیت کئی ایشوز پر بحث کے لئے چیلنج دیا ہے، وہ آئیں اور مجھ سے بحث کریں، لیکن وزیر اعظم مودی کی طرف سے تاحال کوئی جواب نہیں آیا ہے۔

کانگریس صدر راہل گاندھی نے اس سے پہلے بی جے پی کے منشور پر نکتہ چینی کرتے ہوئے اسے کمزور اور تکبر سے بھرا ہوا قرار دیا تھا۔ ساتھ ہی انہوں نے کہا کہ بی جے پی کا منشور عام آدمی کی آواز نہیں ہے، کیونکہ اسے بند کمرے میں بیٹھ کر تیار کیا گیا ہے۔ راہل گاندھی نے کہا بی جے پی کے بر عکس کانگریس پارٹی نے اپنا منشور ملک کے عوام سے مشورے کے بعد تیار کیا ہے لہذا وہ عوام کی مضبوط آواز ہے۔

غور طلب ہے کہ بی جے پی نے منگل کے روز لوک سبھا انتخابات کے لئے انتخابی منشور جاری کیا تھا۔ منشور میں بی جے پی نے اپنے پرانے انہیں وعدوں کو ہی دہرایا ہے جنہیں وہ گزشتہ 5 سال میں بھی پائے تکمیل تک پہنچانے میں ناکام رہی ہے۔ کانگریس کی طرف سے بی جے پی کے منشور پر سخت رد عمل ظاہر کیا گیا ہے۔ کانگریس نے بی جے پی کے پرانے وعدوں کی یاد دہانی کراتے ہوئے کہا تھا کہ جب سال 2014 کے انتخابی منشور پر 125 سوال کھڑے ہوں تو آج کے اس ’جھانسا پتر‘ پر بھروسہ کیسے کیا جائے؟