بہار دورہ پر راہل گاندھی کی دشرتھ مانجھی کے اہل خانہ سے ہوئی ملاقات، بھاگیرتھ اسمبلی انتخاب لڑنے کے خواہشمند

کانگریس رکن پارلیمنٹ راہل گاندھی جمعہ کے روز بہار دورہ پر پہنچے جہاں گیا ضلع میں انھوں نے ’ماؤنٹین مین‘ کے نام سے مشہور دشرتھ مانجھی کے مجسمہ کو پھولوں کی مالا پہنائی۔ گیا کے دشرتھ نگر گاؤں پہنچ کر راہل گاندھی نے دشرتھ مانجھی کے اہل خانہ سے ملاقات بھی کی اور ان کے معمولات سے متعلق جانکاریاں حاصل کیں۔ دشرتھ مانجھی کے بیٹے بھاگیرتھ مانجھی نے راہل گاندھی کا اپنے گھر پر مخلصانہ انداز میں استقبال کیا۔ راہل گاندھی نے انھیں گلے سے لگایا اور ان کے ساتھ بیٹھ کر ناریل پانی بھی پی۔

دشرتھ مانجھی کے اہل خانہ سے راہل گاندھی کی ملاقات کی کئی تصویریں سامنے آئی ہیں، جس میں وہ ایک انتہائی معمولی سے گھر کے اندر بیٹھ کر کچھ لوگوں سے بات کرتے نظر آ رہے ہیں۔ دشرتھ مانجھی کے بیٹے بھاگیرتھ اور دیگر رشتہ داروں نے راہل گاندھی کو اپنی معاشی حالت کے بارے میں جانکاری دی۔ انھوں نے راہل گاندھی سے امداد کی گزارش بھی کی۔ ذرائع کے حوالے سے یہ بھی خبر سامنے آ رہی ہے کہ بھاگیرتھ مانجھی نے بودھ گیا اسمبلی حلقہ سے اسمبلی انتخاب لڑنے کی خواہش بھی راہل گاندھی کے سامنے ظاہر کی۔

بتایا جاتا ہے کہ راہل گاندھی جب دشرتھ نگر گاؤں پہنچے تو ان کا استقبال ڈھول نگاڑوں کے ساتھ کیا گیا۔ بھاگیرتھ مانجھی کے گھر کے اندر بیٹھ کر کچھ دیر تک راہل گاندھی وہاں موجود لوگوں سے بات چیت کرتے نظر آئے۔ پھر گھر سے باہر نکل کر کبھی بڑوں سے اور کبھی بچوں سے گفتگو کرتے ہوئے دیکھے گئے۔ اس کے بعد بھاگیرتھ مانجھی کو اپنے ساتھ لے کر راہل گاندھی راجگیر کے پروگرام میں شرکت کے لیے روانہ ہو گئے۔