کسی کو ملک بدر نہیں کریں گے، راج ناتھ کی ڈھاکہ کو یقین دہانی!

بی جے پی کہتی کچھ ہے اور کرتی کچھ ہے اس کی تصدیق ایک بار پھر اس خبر سے ہوئی ہے کہ این آر سی معاملہ پر وزیر داخلہ راج ناتھ سنگھ نے بنگلہ دیش سے کہا ہوا ہے کہ این آر سی کا کسی کوملک بدر کئے سے کوئی تعلق نہیں ہے ۔

ایک طرف بی جے پی صدر امت شاہ ایوان میں کانگریس کو مخاطب ہو کر کہتے ہیں ’’تمہارے اندر حوصلہ ہی نہیں تھا کہ غیر قانونی بنگلہ دیشیوں کو باہر پھینک دیتے ۔ بی جے پی اور بی جے ڈی(بیجو جنتا دل) کے علاوہ کوئی پارٹی آگے نہیں آئی۔ ملک میں بنگلا دیشیوں کے لئے کوئی جگہ نہیں ہے‘‘۔

دوسری جانب انگریزی اخبار میں شائع ایک خبر کے مطابق بی جے پی کے سابق صدر اور ملک کے وزیر داخلہ راج ناتھ سنگھ نے اپنے بنگلہ دیشی ہم منصب کو پہلے ہی یہ یقین دلا دیا ہے کہ این آر سی کا کسی کو ملک بدر کرنے سے کوئی تعلق نہیں ہے اور بنگلہ دیشیوں کو واپس بھیجنے کی کوئی بات نہیں ہو رہی۔ اب کس کی بات کو صحیح تسلیم کیا جائے بی جے پی کے سابق صدر کو یا موجودہ صدر کو۔

بی جے پی آسام شہریت معاملے سے سیاسی فائدہ اٹھانا چاہتی ہے لیکن چین کی وجہ سے پڑوسی ملک بنگلہ دیش سے موجودہ حالات میں اچھے سفارتی تعلقات رکھنے کی ضرورت ہے ۔ اخبار کے مطابق دہلی نے ڈھاکہ کو پہلے ہی بتا دیا تھا کہ دراصل این آر سی سپریم کورٹ کی نگرانی میں ہو نے والا ایک عمل ہے اور یہ صرف ایک ڈرافٹ ہے اور اس میں بنگلہ دیشیوں کو واپس بھیجنے کی کوئی بات نہیں ہے۔

ذرائع کا کہنا ہے کہ حکومت ہند نے این آر سی معاملہ میں بنگلہ دیشی حکومت کو اعتماد میں رکھا ہوا ہے۔ اخبار کے مطابق راج ناتھ سنگھ نے اپنے بنگلہ دیشی ہم منصب اسعد الزمان خان کو این آر سی کے پورے معاملے سے اپنی ملاقات میں آگاہ کر دیا تھا ۔ منگل کو این آر سی کا ڈرافٹ آنے کے بعد بنگلہ دیش میں مقیم ہندوستانی ہائی کمشنر ہرش وردھن شرنگھلا نے بنگلہ دیش کے وزیر خارجہ اور حکمراں جماعت عوامی لیگ کے سیکریٹری سے بھی ملاقات کی ۔

بی جے پی کی قیادت کے لئے یہ سمجھنا ضروری ہے کہ یہ مسائل انتہائی سنگین حیثیت رکھتے ہیں اس لئے ایسے مدوں کو انتخابی مدا بنانے سے قبل ان کی نزاکت کو سمجھنا چاہئے۔