قومی آواز بلیٹن: راجستھان میں سیاسی بحران ختم؛ ٹرمپ نے پہلی مرتبہ پہنا 'ماسک'

پیش خدمت ہیں آج کی کچھ اہم خبریں: مغربی بنگال میں بی جے پی رکن اسمبلی کی پراسرار حالات میں موت؛ پٹنہ ایمس کے باہر فرش پر تڑپتے کورونا مریضوں کا ویڈیو وائرل، تیجسوی نے کہا ‘بہار کو اب بھگوان بچائے’

user

قومی آوازبیورو

اشوک گہلوت کی حمایت میں کانگریس کے 102 ارکان اسمبلی میٹنگ میں پہنچے

راجستھان میں سیاسی بحران اس وقت ختم ہوگیا جب وزیر اعلی اشوک گہلوت اپنے 102 حامی ارکان اسمبلی کو میٹنگ میں بلانے میں کامیاب ہو گئے۔ اس سے پہلے راجستھان کانگریس کے انچارج اویناش پانڈے، دہلی سے گئے اجے ماکن اور رندیپ سنگھ سرجے والا نے میڈیا سے خطاب کرتے ہوئے کہا کہ سچن پائلٹ اور تمام کانگریسی رہنماؤں کے لئے کانگریس اعلی کمان کے دروازہ ہمیشہ کھلے ہوئے ہیں۔ انہوں نے کہا کہ یہ ایک خاندان کے اندرونی اختلافات ہیں اور کوئی بھی اپنے خاندان کو نقصان نہیں پہنچاتا، بلکہ بات کر کے حل نکالتا ہے۔ انہوں نے اس موقع پر بی جے پی پر حملہ کرتے ہوئے کہا کہ بی جے پی منتخب حکومت کو گرانے کے لئے پیسہ، انکم ٹیکس، ای ڈی اور سی بی آئی کا استعمال کرتی ہے اور کر رہی ہے۔

ٹرمپ نے پہلی بار پہنا ‘ماسک’، ناقدین نے خوب لیے مزے

کورونا بحران کے دوران امریکی صدر ڈونالڈ ٹرمپ نے پہلی مرتبہ ماسک کیا پہنا، سوشل میڈیا پر ان کے میمز کی بھرمار ہوگئی ہے۔ ناقدین نے اس پر انہیں ہالی ووڈ فلموں کے نفسیاتی اور کرمنل ولین کے کرداروں سے تشبیہ دے ڈالی۔ ’میں ناں مانوں‘ کی تکرار کے بعد بالآخر ماسک پہن کر تصویر کھنچوانے والے امریکی صدر ڈونالڈ ٹرمپ پر سوشل میڈیا کے منچلوں نے خوب حملے کیے۔

سی بی ایس ای بورڈ کے 12 ویں کلاس کے نتائج کا اعلان

سی بی ایس ای بورڈ کے 12 ویں کلاس کے نتائج کا اعلان کر دیا گیا ہے۔ طلباء cbseresults.nic.in پر اپنے نتائج دیکھ سکتے ہیں۔ اس سال 88.78 فیصد طلباء پاس ہوئے ہیں۔ اس سال امتحان میں کارکردگی کے لحاظ سے تریوندرم، بنگلورو اور چنئی سرفہرست ہیں۔ دہلی زون میں پاس ہونے کی کل شرح فیصد 94.39 فیصد ہے، جبکہ لڑکیوں کی شرح 92.15 فیصد ہے۔ اس مرتبہ 12 لاکھ طلباء نے بارہویں کلاس کے امتحان دیئے تھے۔

بنگال میں بی جے پی رکن اسمبلی کی پراسرار حالات میں موت

مغربی بنگال میں شمالی دیناج پور ضلع کے ہمت آباد سے بی جے پی کے رکن اسمبلی دیویندر ناتھ رائے کی لاش پیر کی صبح ان کے گھر سے ایک کلومیٹر دو بندال گاؤں میں ایک دکان کے اندر لٹکی ہوئی پائی گئی۔ بی جے پی قیادت اور رکن اسمبلی کے گھروالوں نے الزام لگایا ہے کہ دیویندر ناتھ رائے کا پہلے قتل کیا گیا اور اس کے بعد انہیں لٹکا دیا گیا۔ پولیس دیویندر ناتھ رائے کی پراسرار حالات میں موت کے واقعہ کی جانچ کر رہی ہے۔ پولیس نے کہا ہے کہ پوسٹ مارٹم کے بعد ہی ان کی موت کی اصل وجہ کا پتہ چل سکے گا۔

ہندوستان میں لگاتار بڑھ رہی ہے کورونا مریضوں کی تعداد، دوسرے دن بھی 28 ہزار سے زائد نئے معاملے

ملک میں کورونا وائرس کی شدت میں دن بہ دن اضافہ ہو رہا ہے اور لگاتار دوسرے دن ساڑھے 28 ہزار سے زیادہ نئے کیسز سامنے آئے ہیں، جس سے متاثرہ افراد کی تعداد بڑھ کر تقریباً 8.78 لاکھ ہوگئی ہے۔ سرکار کی جانب سے جاری اعداد و شمار کے مطابق ملک بھر میں اتوار کے دن کورونا وائرس کے 28701 نئے کیسز رپورٹ ہوئے ہیں، جو ایک دن میں سب سے زیادہ کیسز ہے، جس سے متاثرہ افراد کی مجموعی تعداد بڑھ کر 878254 ہوگئی ہے۔ ملک میں ہلاکتوں کی تعداد 500 اموات کے اضافہ کے ساتھ 23174 ہوگئی ہے۔

پٹنہ ایمس کے باہر فرش پر تڑپتے کورونا مریضوں کا ویڈیو وائرل، تیجسوی نے کہا ‘بہار کو اب بھگوان بچائے’

بہار میں کورونا انفیکشن کے بڑھتے معاملوں کے درمیان نتیش حکومت اور اسپتال کی بدانتظامی سامنے آنے لگی ہے۔ کہیں کورونا پازیٹو مریضوں کو اسپتال میں داخلہ کے لیے مشقتوں کا سامنا کرنا پڑ رہا ہے تو کہیں اسپتال کے باہر ہی مریضوں کو فرش پر تڑپتے ہوئے دیکھا جا رہا ہے۔ ایک دردناک تصویر پٹنہ کے ایمس کی سامنے آ رہی ہے، جہاں بیڈ نہ ہونے کا حوالہ دیتے ہوئے اسپتال انتظامیہ نے کورونا پازیٹو مریضوں کو داخل کرنے سے منع کر دیا۔ ایک ویڈیو میں یہ بھی دیکھا جا رہا ہے کہ پٹنہ ایمس کے باہر فٹ پاتھ پر پی پی ای کِٹ پہنے کچھ کورونا مریض لیٹے ہوئے ہیں اور ان کے اہل خانہ پریشان ہیں کہ آخر ان کا علاج کس طرح ہو۔ بہار اسمبلی میں اپوزیشن لیڈر تیجسوی یادو نے اپنے ٹوئٹ سے مذکورہ ویڈیو شیئر کیا ہے اور کورونا بحران میں بہار کی حالت زار بتانے کی کوشش کی ہے۔ انھوں نے ویڈیو شیئر کرنے کے ساتھ ساتھ یہ بھی لکھا ہے کہ "پٹنہ ایمس کے فٹ پاتھ پر لیٹا شخص کورونا پازیٹو ہے۔ حکومت، انتظامیہ اور اسپتال کوئی نہیں سن رہا ہے۔ بہار میں کورونا کی حالت بہت خطرناک ہے۔ آنے والے دنوں میں حالات بے قابو ہونے والے ہیں۔ حکومت جانچ نہیں کر رہی، کر رہی ہے تو نمبر چھپا رہی ہے۔ بہار کو اب بھگوان بچائے...۔"

قومی آواز کے قارئین و ناظرین سے ضروری درخواست، کووڈ- 19 کے پیش نظر سوشل ڈسٹینسنگ پر عمل کریں، شکریہ
Published: 13 Jul 2020, 9:11 PM
next